الزامات تو کوئی کچھ بھی لگا سکتا ہے، چیف جسٹس کا کمشنر راولپنڈی کے بیان پر ردعمل

چیف جسٹس پاکستان جسٹس قاضی فائز عیسیٰ نے کمشنر راولپنڈی لیاقت علی چٹھہ کے انتخابات میں دھاندلی سے متعلق بیان پر کہا ہے کہ الزامات تو کوئی کچھ بھی لگا سکتا ہے۔

کمنشر راولپنڈی لیاقت علی چٹھہ نے اپنے ایک بیان میں کہا ہے کہ عام انتخابات میں دھاندلی ہوئی ہے اور ان پر دباؤ ڈالا گیا کہ ہارنے والے امیدواروں کو جتوایا جائے۔

صحافیوں سے غیر رسمی گفتگو کرتے ہوئے جسٹس قاضی فائز عیسیٰ نے کہا کہ الزامات لگانا حق ہے لیکن اس کے ساتھ ثبوت بھی پیش کرنا ہوتا ہے۔ نہ کوئی ثبوت ہے نہ صداقت، ایسے تو کل کو چوری کا بھی الزام لگا دیں۔

کمشنر راولپنڈی کے الزامات پر چیف جسٹس قاضی فائز عیسٰی کا ردعمل سامنے آگیا#QaziFaezIsa #CommissionerRawalpindi #WENews pic.twitter.com/IFM0HTOGwM

— WE News (@WENewsPk) February 17, 2024

انہوں نے کہاکہ ‏الیکشن کروانا الیکشن کمیشن کی ذمہ داری ہے، پٹیشنز آتی رہتی ہیں اور ہم ان پرفیصلے بھی کرتے ہیں۔ الیکشن سے میرا کوئی تعلق نہیں، بے بنیاد الزامات لگا کر اداروں کو تباہ نہ کریں۔

چیف جسٹس قاضی فائز عیسیٰ نے کہاکہ اگر آپ پاکستان کے دشمن ہیں تو اداروں کو تباہ کریں۔

واضح رہے کہ 8 فروری کو ملک میں ہونے والے عام انتخابات کو پاکستان تحریک انصاف سمیت دیگر سیاسی جماعتوں نے دھاندلی زدہ قرار دیا ہے۔

پاکستان تحریک انصاف کا الزام ہے کہ ان کی جماعت قومی اسمبلی کی 180 سے زیادہ نشستیں جیتی ہوئی تھی مگر الیکشن کمیشن نے دھاندلی سے ان کو ہرایا۔

پی ٹی آئی کے رہنماؤں نے گزشتہ روز انٹرنیشنل میڈیا کو اس حوالے سے بریفنگ بھی دی ہے کہ فارم 45 کے مطابق وہ کن کن حلقوں سے جیتے ہوئے تھے اور کیسے نتائج کو تبدیل کیا گیا۔

مسلم لیگ ن نے کمشنر کے بیان کو عالمی سازش کا حصہ قرار دےدیا

دوسری جانب پاکستان مسلم لیگ ن نے کمشنر راولپنڈی کے بیان کو عالمی سازش کا حصہ قرار دیتے ہوئے کہا ہے کہ ملک کو مزید عدم استحکام میں دھکیلنے کی سازش ہورہی ہے۔

مسلم لیگ ن کے سینیئر رہنما اور راولپنڈی سے الیکشن جیتنے والے حنیف عباسی نے چوہدری تنویر کے ہمراہ پریس کانفرنس کرتے ہوئے کہا کہ ہم کسی صورت اپنا مینڈیٹ نہیں چھیننے دیں گے۔

مسلم لیگ ن کے سینیئر رہنما اور سابق وفاقی وزیر داخلہ رانا ثنااللہ کا کہنا ہے کہ لیاقت علی چٹھہ میرے پرانے دوست ہیں، ان کے ذہنی صحت کے کچھ مسائل ہیں۔