بلوچستان کے ضلع خضدار کے پہاڑی سلسلے ’شور پرود‘ میں سیکیورٹی فورسز نے خفیہ اطلاع پر کامیاب آپریشن کرتے ہوئے ‘فتنہ ہندوستان’ کے 10 دہشتگردوں کو ہلاک اور متعدد کو شدید زخمی کر دیا ہے۔
سیکیورٹی ذرائع کے مطابق فورسز نے دہشتگردوں کے ٹھکانوں کو گھیراؤ میں لے کر مؤثر کارروائی کی، جبکہ علاقے سے دہشتگردی کے مکمل خاتمے تک آپریشنز جاری رکھنے کے عزم کا اعادہ کیا گیا ہے۔
انٹیلی جنس بیسڈ آپریشن اور فائرنگ کا تبادلہ
سیکیورٹی ذرائع کے مطابق سیکیورٹی فورسز کو خضدار کے دشوار گزار پہاڑی سلسلے ’شور پرود‘ میں ’فتنہ الہندوستان‘ سے تعلق رکھنے والے دہشتگردوں کی موجودگی کی اطلاعات موصول ہوئی تھیں۔
یہ بھی پڑھیں:تربت: فتنہ الہندوستان کے دہشتگرد عثمان سے والدہ کا اعلانِ لاتعلقی
جس پر فورسز نے بروقت اور حکمتِ عملی کے تحت کارروائی کرتے ہوئے دہشتگردوں کی معصوم شہریوں پر حملوں کی منصوبہ بندی کو ناکام بنا دیا اور ان کے ٹھکانوں کو چاروں طرف سے محاصرے میں لے لیا۔
خود کو گھرا دیکھ کر دہشتگردوں نے فائرنگ شروع کر دی، جس پر سیکیورٹی فورسز کی بھرپور اور مؤثر جوابی کارروائی کے نتیجے میں 10 دہشتگرد موقع پر ہی ہلاک ہو گئے جبکہ ان کے متعدد ساتھی شدید زخمی حالت میں فرار ہو گئے۔
یہ بھی پڑھیں:پنجگور میں فتنہ الہندوستان کے اہم سرغنہ وزیر ولد جمال سمیت 5 دہشتگرد ہلاک
سیکیورٹی حکام کا کہنا ہے کہ سیکیورٹی فورسز ملک سے دہشتگردی کے ناسور کو جڑ سے اکھاڑ پھینکنے اور ملک دشمن عناصر کی تمام تر کوششوں کو ناکام بنانے کے لیے مکمل طور پر پرعزم ہیں۔
واقعے کے فوراً بعد علاقے کو مکمل طور پر پاک کرنے کے لیے سرچ اور کلیئرنس آپریشن شروع کر دیا گیا ہے تاکہ فرار ہونے والے زخمی دہشتگردوں کی گرفتاری کو بھی ممکن بنایا جا سکے۔
سیکیورٹی ذرائع نے واضح کیا کہ دشمن کے ناپاک عزائم کو خاک میں ملانے کے لیے اس نوعیت کی ہدف شدہ کارروائیاں جاری رہیں گی۔
بلوچستان کا ضلع خضدار اور اس کے ملحقہ پہاڑی سلسلے ماضی میں بھی بیرونی پشت پناہی حاصل کرنے والے تخریب کاروں کی پناہ گاہوں کے طور پر استعمال ہوتے رہے ہیں۔
مزید پڑھیں:نوشکی: فتنہ الہندوستان کے دہشتگردوں نے کنٹینر نذر آتش کردیا، ڈرائیور محفوظ رہا
سیکیورٹی فورسز نے انٹیلی جنس بیسڈ آپریشنز کا دائرہ کار وسیع کرتے ہوئے صوبے بھر میں ‘فتنہ الہندوستان’ سمیت دیگر کالعدم گروہوں کے نیٹ ورکس کو توڑنے میں اہم کامیابیاں حاصل کی ہیں، تاکہ صوبے کی معاشی ترقی اور امن و امان کو یقینی بنایا جا سکے۔
