وزارت عظمیٰ کے لیے مسلم لیگ ن اور اتحادیوں کے امیدوار شہباز شریف اور سنی اتحاد کونسل کے امیدوار عمر ایوب کے کاغذات نامزدگی منظور کر لیے گئے۔
اتحادی جماعتوں کے متفقہ امیدوار شہباز شریف کے کاغذات نامزدگی سیکریٹری قومی اسمبلی کے پاس جمع کرائے گئے تھے جو سیکریٹری طاہر حسین نے وصول کیے۔
مزید پڑھیں
دوسری جانب سنی اتحاد کونسل کے امیدوار عمر ایوب کے کاغذات بھی جمع کرائے گئے تھے۔
قومی اسمبلی سیکریٹریٹ نے بتایا ہے کہ شہباز شریف اور ایوب کے کاغذات نامزدگی جانچ پڑتال کے بعد منظور کر لیے گئے ہیں۔
سنی اتحاد کونسل کی جانب سے شہباز شریف کے کاغذات نامزدگی پر اعتراض کیا گیا تھا جو مسترد کر دیا گیا۔
اسپیکر قومی اسمبلی سردار ایاز صادق نے وزارت عظمیٰ کے امیدواروں شہباز شریف اور عمر ایوب کے تجویز اور تائید کنندگان کی موجودگی میں کاغذات کی جانچ پڑتال کی۔
واضح رہے کہ وزارت عظمیٰ کے لیے ایوان میں 169 ارکان کی حمایت درکار ہے، جبکہ اتحادی جماعتوں کو اس وقت 209 ارکان کی حمایت حاصل ہے۔
اتحادی جماعتوں کے امیدوار شہباز شریف کو پاکستان پیپلزپارٹی، بلوچستان عوامی پارٹی، ایم کیو ایم پاکستان، استحکام پاکستان پارٹی کی حمایت حاصل ہے، جبکہ دوسری جانب سنی اتحاد کونسل کو ایوان میں 91 ارکان کی حمایت حاصل ہے۔
قومی اسمبلی میں وزیراعظم کا انتخاب کل 3 مارچ کو ہوگا جس کا شیڈول جاری کر دیاگیا۔
