ایکس کیوں بند ہے، ہمیں بھی معلوم نہیں، وزیر اطلاعات عطا تارڑ

وفاقی وزیر اطلاعات عطااللہ تارڑ نے کہا ہے کہ سوشل میڈیا پلیٹ فارم سائٹ ’ایکس‘ (سابقہ ٹویٹر) کیوں بند ہے، اس حوالے سے انہیں بھی علم نہیں۔

وی نیوز سے خصوصی انٹرویو میں ایکس کی بندش کے بارے میں پوچھے گئے ایک سوال کے جواب میں وفاقی وزیر اطلاعات عطا تارڑ نے کہا کہ ہم نے جب حکومت سنبھالی تو سوشل میڈیا پلیٹ فارم ایکس کو بندش کا سامنا تھا اور اس کی بندش کا کوئی آفیشل نوٹیفکیشن نہیں ہے۔

عطا تارڑ نے کہا کہ یہ بات بالکل درست ہے اور سب کو نظر بھی آ رہا ہے کہ ایکس کے سگنلز اور فریکونسی پہلے کی طرح نہیں چل رہی اور وی پی این کے ذریعے اسے استعمال کیا جا رہا ہے۔

ہم جب سے حکومت میں آئے ہیں ٹوئٹر بند ہے۔ ٹوئٹر کو بحال ہونا چاہیے، وفاقی وزیر اطلاعات عطا تارڑ
@TararAttaullah #WENews #PMLN #ShehbazSharif pic.twitter.com/BQ16c0VVvq

— WE News (@WENewsPk) March 18, 2024

انہوں نے کہا کہ وہ چاہتے ہیں کہ سوشل میڈیا کے حوالے سے تمام سیاسی جماعتوں کے مابین ایک چارٹر ہونا چاہیے کہ ریڈلائن کراس نہ ہو۔ انہوں نے کہا کہ سوشل میڈیا پر خواتین سے بدتہذیبی کی جاتی ہے، شہدا کی قربانیوں کا مذاق اڑایا جاتا ہے، ایسے مسائل سے نمٹنے کے لیے ایک چارٹر کرنے کی ضرورت ہے، تمام سیاسی جماعتوں کے درمیان اگر یہ چارٹر طے پا جائے تو یہ ایک اچھی بات ہوگی۔