صدر مملکت آصف علی زرداری نے کہا ہے کہ پاکستان دہشت گردوں کو خطے میں امن، خوشحالی اور سلامتی کے لیے ہمارے مشترکہ اہداف کو کمزور کرنے کی ہرگز اجازت نہیں دے گا۔
صدر مملکت آصف زرداری نے چینی سفارتخانے کا دورہ کیا جہاں انہوں نے شانگلہ میں خود کش حملے کے نتیجے میں چینی شہریوں کی ہلاکت پر افسوس کا اظہار کیا۔
مزید پڑھیں
آصف زرداری نے کہاکہ غیر انسانی حملہ دونوں ممالک کے درمیان پائیدار دوستی اور مشترکہ اقدار پر حملہ ہے، یہ واقعہ پاک چین دوستی کے دشمنوں کی طرف سے ترتیب دیا گیا تھا۔
چینی سفیر چیانگ زئے دونگ نے سفارت خانے آمد پر صدر آصف علی زرداری کا استقبال کیا۔
صدر مملکت نے کہا کہ پاکستانی قوم چینی عوام کے غم میں برابر کی شریک ہے، دکھ کی اس گھڑی میں پاکستانی عوام چینی عوام کے ساتھ کھڑے ہیں۔
پاک چین تعلقات کی مضبوطی دشمن قبول نہیں کر سکتا، صدر مملکت
انہوں نے کہاکہ دشمن یہ قبول نہیں کر سکتا کہ پاک چین دوطرفہ تعلقات مزید مضبوط ہو رہے ہیں، بہیمانہ فعل میں ملوث مجرموں کو پکڑ کر انصاف کے کٹہرے میں لایا جائے گا۔
صدر مملکت نے کہا کہ پاکستان میں مختلف منصوبوں پر کام کرنے والے چینی شہریوں کی سیکیورٹی یقینی بنانے کے لیے تمام ضروری اقدامات لیے جائیں گے۔
چینی سفیر کا دہشتگردوں کو پکڑنے کی ضرورت پر زور
چینی سفیر نے تعزیت کے لیے ذاتی طور پر سفارت خانے کا دورہ کرنے پر صدر مملکت کا شکریہ ادا کیا۔
چینی سفیر نے انسداد دہشت گردی میں تعاون بڑھانے، پاکستان میں چینی کارکنوں کو تحفظ فراہم کرنے کی ضرورت پر زور دیا۔ انہوں نے کہا کہ دہشت گرد انسانیت کے دشمن ہیں، انہیں بے گناہ لوگوں کو نشانہ بنانے پر پکڑنے کی ضرورت ہے۔
