موسمیاتی تبدیلی سے نمٹنے کے لیے جامع اور موثر لائحہ عمل تشکیل دینے کی ضرورت ہے، وزیراعظم شہباز شریف

وزیراعظم پاکستان شہباز شریف نے کہا ہے کہ موسمیاتی تبدیلی کا مقابلہ کرنے کے لیے ایک جامع اور موثر لائحہ عمل تشکیل دینے کی ضرورت ہے، موسمیاتی تبدیلی ایک انتہائی اہم مسئلہ ہے۔

وزیراعظم شہباز شریف کی زیرصدارت وزارت موسمیاتی تبدیلی کے امور کے حوالے سے اجلاس منعقد ہوا۔ جس میں وزیراعظم کو موسمیاتی تبدیلی کے حوالے سے بنائی گئی پالیسیوں اور منصوبوں کی حالیہ پیشرفت کے حوالے سے بریفنگ دی گئی۔

اس موقع پر وزیراعظم نے کہاکہ موسمیاتی تبدیلی ایک انتہائی اہم مسئلہ ہے، پاکستان موسمیاتی تبدیلی سے سب سے زیادہ متاثر ہونے والے اور ماحولیاتی تباہی میں سب سے کم حصہ رکھنے والے ممالک میں شامل ہے۔

شہباز شریف نے کہاکہ موسمیاتی تبدیلی سے مقابلہ کرنے کے لیے ایک جامع اور موثر لائحہ عمل تشکیل دینے کی ضرورت ہے، ماحولیاتی تبدیلی زراعت، توانائی، پانی، انفراسٹرکچر اور کئی دیگر شعبوں کے ساتھ منسلک ہے۔

وزیراعظم نے موسمیاتی تبدیلی سے پیدا ہونے والے مسائل کی نشاندہی اور ان سے نمٹنے کے لیے ایک کمیٹی تشکیل دینے کی ہدایت کی۔

اجلاس میں وفاقی وزیراطلاعات و نشریات عطا تارڑ، وفاقی وزیر منصوبہ بندی و ترقی احسن اقبال، وفاقی وزیر برائے اقتصادی امور احد چیمہ، متعلقہ اداروں کے اعلیٰ افسران اور شعبہ ماحولیاتی تبدیلی کے ماہرین شامل تھے۔