وفاقی وزیر خزانہ و محصولات محمد اورنگزیب نے کہا ہے کہ حکومت نجی شعبے کو سرمایہ کاری کے لیے سازگار ماحول کی فراہمی اور مالیاتی امور میں شفافیت اور احتساب کو یقینی بنانے میں پرعزم ہے۔
وزیر خزانہ محمد اورنگزیب سے پاکستان میں عالمی بینک کے کنٹری ڈائریکٹر ناجی بن حسائن اور انٹرنیشنل فنانس کارپوریشن کے کنٹری مینیجر ذیشان احمد شیخ نے ملاقات کی ہے۔
مزید پڑھیں
فریقین نے مشترکہ ترقیاتی حکمت عملی اور اقدامات پر تبادلہ خیال کیا۔ ملاقات میں بین الاقوامی مالیاتی اداروں عالمی بینک اور پاکستان کے درمیان تعلقات، شراکت داری اور روابط کے فروغ سے متعلق امور کا تفصیل سے جائزہ لیا گیا۔
اس موقع پر پاکستان کے لیے ترقیاتی ایجنڈے کے بارے میں وسائل کی فراہمی سے متعلق امور کا بھی جائزہ لیا گیا۔
عالمی بینک اور بین الاقوامی مالیاتی کارپوریشن کے نمائندوں نے اقتصادی اور سماجی شعبوں میں اصلاحات لانے کے لیے حکومتی کوششوں اورعزم کی تعریف کی جس کا بنیادی مقصد ٹیکس کی بنیاد کو وسیع کرنا، سرکاری ملکیتی اداروں کی ری اسٹرکچرنگ اور نجکاری کو فروغ دینا ہے۔
فریقین نے زراعت، بجلی اور انفارمیشن ٹیکنالوجی کے شعبوں میں سرمایہ کاری کے مواقع و استعداد کا بھی جائزہ لیا۔
عالمی بینک اور بین الاقوامی مالیاتی کارپوریشن کے نمائندوں نے حکومت کے ترقیاتی ایجنڈا اور پاکستانی عوام کی فلاح و بہبود کے لیے اپنے اپنے اداروں کی جانب سے مکمل تعاون کا یقین دلایا۔
