اشیائے ضروریہ کی قیمتوں میں ہفتہ وار بنیادوں پرکتنا اضافہ ہوا؟

ملک میں روزمرہ استعمال کی ضروری اشیاء کی قیمتوں میں ہفتہ واربنیادوں پر0.96 فیصد اورسالانہ بنیادوں پر29.45 فیصدکااضافہ ریکارڈکیاگیاہے۔

پاکستان بیوروبرائے شماریات کی جانب سے ضروری اشیاء کی قیمتوں بارے حساس عشاریہ (ایس پی آئی) کے مطابق 4 اپریل کوختم ہونے والے ہفتے میں 13 ضروری اشیاء کی قیمتوں میں کمی اور22 کی قیمتوں میں استحکام رہا۔اس کے برعکس 16 اشیاء کی قیمتوں میں اضافہ ہوا۔

گزشتہ ہفتے کے دوران کیلا کی قیمت میں 3.57 فیصد، آٹا 2.68 فیصد، انڈے 1.89 فیصد، ایل پی جی 1.89 فیصد، ڈیزل 1.18 فیصد،گڑ0.63 فیصد، چینی 0.41 فیصد، سرسوں کاتیل 0.26 فیصد، دال مسور0.25فیصد، اورآلو کی قیمت میں 0.23 فیصدکی کمی ہوئی۔

اس کے برعکس خواتین کے جوتوں کی قیمت میں 12.52 فیصد، ٹماٹر11.93 فیصد، مردانہ جوتے 8.70 فیصد، پیٹرول 3.45 فیصد، چکن 2.99 فیصد، کپڑے 2.23 فیصد، پیاز 1.30 فیصد، روٹی 1.03 فیصد، بیف 0.75 فیصد، لہسن 0.70 فیصد، مٹن 0.41 فیصد اور باسمتی چاول ٹوٹا کی قیمت میں 0.14 فیصدکا اضافہ ہوا۔

سب سے کم یعنی 17732 روپے ماہوارآمدنی رکھنے والے گروپ کیلئے قیمتوں کے حساس اعشاریہ میں 0.83 فیصدکااضافہ ہوا، 17734 روپے سے لیکر22888 روپے، 22889 روپے سے لیکر29517 روپے، 29518 روپے سے لیکر 44175 اور اس سے زیادہ ماہوارآمدنی رکھنے والے گروپوں کے لیے قیمتوں کے حساس عشاریہ میں بالترتیب 0.90 فیصد، 0.85 فیصد، 0.93 فیصد اور1.02 فیصدکااضافہ ہوا۔

صارفین کے لیے قیمتوں کے حساس عشاریہ کاتعین ملک کے 17 بڑے شہروں کی 50 مارکیٹوں میں 51 ضروری اشیاء کی قیمتوں میں کمی بیشی کی بنیادپرکیا جاتاہے۔