وزیر دفاع خواجہ آصف نے کہا ہے کہ بھارت اگر کشمیر پر لچک دکھائے تو تجارتی تعلقات بحال ہوسکتے ہیں، مگر انڈیا میں انتخابات ہونے تک یہ ممکن نہیں۔
نجی ٹی وی سے گفتگو کرتے ہوئے انہوں نے کہاکہ پاک ایران گیس پائپ لائن منصوبہ مکمل کرنے کا فیصلہ کرلیا۔ گوادر سے ایرانی سرحد تک اپنے حصے کی گیس پائپ لائن بنا رہے ہیں۔ ایران کے ساتھ ایک واقعہ ہوا تھا مگر اب تعلقات مستحکم ہیں۔
مزید پڑھیں
خواجہ آصف نے کہاکہ اسرائیل فلسطین جنگ کے اثرات پوری دنیا میں جائیں گے، جو بڑے ممالک اسرائیل کی پشت پناہی کررہے ہیں یہ آگ ان کو بھی لپیٹ میں لے گی۔ جبکہ پاکستان پر بھی اس کے اثرات ہوں گے۔
انہوں نے کہاکہ پاکستان فلسطین کی آزادی کے دعا گو اور ان کا حمایتی ہے، ہم نہیں چاہتے کہ کشیدگی بڑھے لیکن فلسطین میں قتل عام بند ہونا چاہیے۔
وزیر دفاع نے کہاکہ فلسطینیوں کی قربانیاں رائیگاں نہیں جائیں گی، ان کو ایک دن ضرور آزادی نصیب ہوگی۔
خواجہ آصف نے کہاکہ اسرائیل کی طرف سے ایک خود مختار ملک کے سفارتخانے پر حملہ کیا گیا تھا جس کے بعد ایران کو کارروائی کا مکمل حق تھا۔
انہوں نے مزید کہاکہ پاکستان کے سعودی عرب اور یو اے ای کے ساتھ اچھے تعلقات ہیں۔
اپوزیشن کی جنگ اقتدار میں حصے کی ہے
ایک سوال کے جواب میں انہوں نے کہاکہ اپوزیشن کی جنگ اقتدار میں حصے کی ہے، کیونکہ مولانا فضل الرحمان، محمود اچکزئی اور دیگر گزشتہ اتحادی حکومت میں ہمارے ساتھ تھے۔
