اسلام آباد ہائیکورٹ نے بانی چیئرمین تحریک انصاف عمران خان کی اہلیہ بشریٰ بی بی کی بنی گالہ سے اڈیالہ جیل منتقلی کے لیے دائر درخواست عدم پیروی پر خارج کردی ہے۔
ٰاسلام آباد ہائیکورٹ کے جسٹس میاں گل حسن اورنگزیب نے بشریٰ بی بی کی بنی گالہ سے اڈیالہ جیل میں منتقلی کے لیے دائر درخواست پر سماعت کی، اس موقع پر بشری بی بی کے وکلاء عدالت میں پیش نہیں ہوئے۔
مزید پڑھیں
جسٹس میاں گل حسن اورنگزیب نے بشریٰ بی بی کے وکلاء کی عدم پیشی پر سخت برہمی کا اظہار کرتے ہوئے رہمارکس دیے ’کیا دونوں فریقین عدالت کے ساتھ سیاست کررہے ہیں، شعیب شاہین آئے تھے انہیں بتایا بھی تھا لیکن وہ بھی چلے گئے۔‘
معزز جج نے ریمارکس دیے’ یہ وہ بھی نہیں چاہتے ہیں کہ گھر سے جیل چلی جائے، جو انہوں نے ریلیف مانگا بھی ہے پتہ نہیں وہ چاہتے بھی ہیں یا نہیں ، عدالت کے ساتھ سیاست کھیل رہے ہیں۔‘
جسٹس میاں گل حسن اورنگزیب نے بشریٰ بی بی کی درخواست خارج کرنے کے احکامات جاری کر دیے۔
واضح رہے کہ توشہ خانہ کیس میں سزا یافتہ سابق وزیر اعظم و بانی چیئرمین تحریک انصاف کی اہلیہ بشریٰ بی بی کو بنی گالہ منتقل کر کے ان کی رہائش گاہ کو سب جیل قرار دے دیا گیا تھا۔
بشریٰ بی بی نے سب جیل قرار دی گئی بنی گالہ سے واپس اڈیالہ جیل منتقلی کے لیے اسلام آباد ہائیکورٹ سے رجوع کیا تھا۔
