کار میں سوار خواتین اور بچوں سمیت ایک ہی خاندان کے 8 افراد بلوچستان کے ضلع آواران میں ایک سیلابی ریلے کا شکار ہوکر جاں کی بازی ہار گئے ہیں۔
ضلع آواران کی تحصیل جھاؤ میں گزشتہ شب طوفانی بارش کے باعث ندی نالوں میں تغیانی پیدا ہونے کے باعث ایک گاڑی سیلابی ریلے میں بہہ گئی اور کار سواروں میں سے کوئی بھی باہر نہ نکل سکا۔
ڈپٹی کمشنر آواران کے مطابق آواران سے جھاؤ کے درمیان برساتی نالے میں ایک گاڑی کے سیلابی ریلے میں بہہ جانے کا جان لیوا حادثہ پیش آیا جس میں ایک ہی خاندان کے 8 افراد ہلاک ہو گئے ہیں۔
’جاں بحق افراد میں خواتین اور بچے شامل ہیں۔ ریسکیو اہلکاروں نے 7 لاشیں نکال لی ہیں جب کہ ایک بچے کی تلاش جاری ہے۔‘
وزیر اعلٰی بلوچستان میر عبدالقدوس بزنجو نے آواران میں سیلابی ریلے میں گاڑی بہہ جانے سے آٹھ افراد کی ہلاکت پر دکھ اور افسوس کا اظہار کرتے ہوئے متاثرہ خاندان کو بھرپور معاونت کی پیشکش کی ہے۔
وزیر اعلٰی بلوچستان نے ضلعی انتظامیہ کو بارشوں اور سیلابی ریلوں کو مدنظر رکھتے ھوئے لوگوں کی آمد و رفت کو محفوظ بنانے کی بھی ہدایت کی ہے۔
’بارشوں اور سیلابی ریلوں کے خدشات کو سامنے رکھتے ہوۓ سفر کرنے والے لوگوں کی رہنمائی کی جاۓ۔احتیاطی تدابیر کے زریعہ ناخوشگوار حادثات سے بچاؤ ممکن ہے۔‘
