پاکستان اور چین کے مابین 4 مفاہمتی یادداشتوں پر دستخط کیے گئے ہیں۔
مفاہمتی یادداشتوں پر دستخطوں کی تقریب منگل 23 اپریل کو اسلام آباد میں ہوئی۔
ان مفاہمتی یاداشتوں میں سیلاب کے بعد بحالی، اطلاعات و مواصلاتی ٹیکنالوجی، جنکاؤ ٹیکنالوجی، منصوبہ سازی برائے چین پاکستان ترقیاتی تعاون 28-2024 شامل ہیں۔
مزید پڑھیں
اس کے علاوہ کوئٹہ میں ابتدائی طبی امداد سینٹر کے لیے لیٹر آف ایکسچینج اور عالمی ترقیاتی اقدام کے تحت افرادی قوت کی ترقی سے متعلق پروٹوکول پر بھی دستخط کیے گئے۔
یہ معاہدے پاکستان اور چین کے مابین مختلف شعبوں میں تعاون کے مزید فروغ کی عکاسی کرتے ہیں۔
قبل ازیں وزیراعظم پاکستان شہباز شریف سے چیئرمین چائنا ڈویلپمنٹ کوآپریشن ایجنسی لؤو ژاؤہوئی کی سربراہی میں چین کےاعلی سطح کے وفد نے ملاقات کی ہے۔
چین نے پاکستان کی ہرمشکل میں مدد کی، وزیراعظم
وفد کا خیر مقدم کرتے ہوئے وزیراعظم شہباز شریف نے کہاکہ چین پاکستان کا دیرینہ دوست ہے جس نے پاکستان کی ہر مشکل وقت میں مدد کی جس پر مجھ سمیت پوری قوم ان کی شکرگزار ہے۔
شہباز شریف نے چائنا ڈویلپمنٹ کوآپریشن ایجنسی کے پاکستان کی اقتصادی ترقی میں کلیدی کردار کی تعریف کرتے ہوئے انہیں خراج تحسین پیش کیا۔
وزیراعظم شہباز شریف نے کہاکہ سی پیک نے پاکستان کی سماجی و معاشی ترقی میں اہم کردار ادا کرنے کے ساتھ ساتھ دونوں ممالک کے لوگوں کی خوشحالی میں اہم کردار ادا کیا ہے۔
سی پیک کا دوسرا مرحلہ مختلف شعبوں میں ترقی کا باعث بنے گا
انہوں نے اس امید کا اظہار کیاکہ سی پیک کا دوسرا مرحلہ صنعت، سائنس و ٹیکنالوجی اور گرین ڈویلپمنٹ کے شعبوں میں ترقی کا باعث بنے گا۔
شہباز شریف نے کہاکہ سی پیک کا دوسرا مرحلہ دونوں ممالک کے نجی شعبوں کے لیے اشتراک کا ایک اہم موقع ہے۔
اس موقع پر پاکستان میں چین کے سفیر جیانگ ژائیڈونگ بھی ملاقات میں شریک تھے۔ اس کے علاوہ وفاقی وزرا اسحاق ڈار، احد خان چیمہ، محمد اورنگزیب، محسن رضا نقوی، احسن اقبال، معاون خصوصی طارق فاطمی اور اعلیٰ پاکستانی و چینی حکام نے بھی ملاقات میں شرکت کی۔
