ملک کے تجارتی خسارہ میں جاری مالی سال کے پہلے 10 ماہ میں سالانہ بنیادوں پر17.09 فیصدکی کمی ریکارڈکی گئی ہے۔
مزید پڑھیں
جاری مالی سال کے دوران پاکستان کی برآمدات میں سالانہ بنیادوں پر 9.10 فیصد کا اضافہ اور درآمدات میں 4.09 فیصد کی کمی ریکارڈ کی گئی۔
پاکستان بیورو برائے شماریات کی جانب سے اس حوالے سے جاری کردہ اعدادوشمار کے مطابق جولائی 2023 سے لے کر اپریل 2024 تک کی مدت میں پاکستان کا تجارتی خسارہ 19.51 ارب ڈالر ریکارڈ کیا گیا جو گزشتہ مالی سال کی اسی مدت کے 23.53 ارب ڈالرکے مقابلہ میں 17.09 فیصدکم ہے۔
اپریل میں پاکستان کے تجارتی خسارہ کاحجم 2.37 ارب ڈالر رہا جوگزشتہ سال اپریل کے مقابلہ میں 180.58 فیصدزیادہ ہے۔
گزشتہ سال اپریل میں پاکستان کے تجارتی خسارہ کا حجم 846 ملین ڈالرریکارڈ کیا گیا تھا۔
اعدادوشمارکے مطابق جاری مالی سال کے پہلے 10ماہ میں پاکستان کی برآمدات کاکل حجم 25.28 ارب ڈالر ریکارڈ کیا گیا جو گزشتہ مالی سال کی اسی مدت کے مقابلہ میں 9.10 فیصد زیادہ ہے۔
گزشتہ مالی سال کی اسی مدت میں ملکی برآمدات کاکل حجم 23.17 ارب ڈالر ریکارڈ کیا گیا تھا۔ اپریل میں برآمدات سے ملک کو 2.34 ارب ڈالر کا زرمبادلہ حاصل ہوا جو گزشتہ سال اپریل کے 2.13 ارب ڈالرکے مقابلہ میں 10.02 فیصد زیادہ ہے۔
اعدادوشمارکے مطابق جاری مالی سال کے پہلے 10ماہ میں پاکستان کی کل درآمدات کاحجم 44.79 ارب ڈالر ریکارڈ کیا گیا ہے جوگزشتہ مالی سال کی اسی مدت کے مقابلہ میں 4.09 فیصد کم ہے۔
گزشتہ مالی سال کی اسی مدت میں پاکستان کی مجموعی درآمدات پر46.70 ارب ڈالرکا زرمبادلہ خرچ ہوا تھا۔اپریل میں پاکستان کا درآمدی بل 4.72 ارب ڈالر رہا جوگزشتہ سال اپریل کے 2.98 ارب ڈالرکے مقابلہ میں 58.43 فیصد زیادہ ہے۔
