9 مئی کو سیاہ باب رقم کرنے والوں سے سمجھوتا ہو سکتا ہے نہ کوئی ڈیل، آرمی چیف

آرمی چیف جنرل سید عاصم منیر نے کہا ہے کہ 9 مئی پاکستان کی تاریخ میں سیاہ دن رہے گا، اس دن شر پسندوں نے شہدا کی یاد گاروں کی دانستہ بے حرمتی کی، ریاست اور قومی اتحاد کی علامتوں پر حملہ کیا، پاک فوج کا ہر سپاہی اور افسر روزانہ کی بنیاد پر قربانیاں دے رہا ہے۔

پاک فوج کے محکمہ تعلقات عامہ ( آئی ایس پی آر) کی جانب سے جاری بیان کے مطابق جمعرات کو آرمی چیف جنرل سید عاصم منیر کا لاہور گیریژن کا دورہ کیا اور یہاں فوجی جوانوں اور افسران سے خطاب کرتے ہوئے کہا کہ اس میں کوئی شک نہیں کہ 9 مئی پاکستان کی تاریخ میں سیاہ ترین دن کے طور پر یاد کیا جاتا رہے گا کیوں کہ اس دن شر پسندوں نے ہمارے عظیم شہدا کی یاد گاروں کی سوچے سمجھے منصوبے کے تحت بے حرمتی کی اور ریاست اور قومی اتحاد کی علامتوں پر حملے کیے۔

بیان کے مطابق انہوں نے کہا کہ پر تشدد، مذموم کارروائیوں سے پاکستان دشمنوں کو ریاست اور قوم کا مذاق اڑانے کا موقع دیا، اب وہی سازشی عناصر ڈھٹائی سے بیانیہ توڑ موڑ کر ریاست کو ملوث کرنے کی کوشش کر رہے ہیں۔ تاریخ کا سیاہ باب رقم کرنے والوں سے کوئی سمجھوتا ہو سکتا ہے نہ کوئی ڈیل ہو سکتی ہے۔

انہوں نے کہا کہ پر تشدد، مذموم کارروائیوں سے پاکستان دشمنوں کو ریاست اور قوم کا مذاق اڑانے کا موقع دیا، اب وہی سازشی عناصر ڈھٹائی سے بیانیہ توڑ موڑ کر ریاست کو ملوث کرنے کی کوشش کر رہے ہیں۔ تاریخ کا سیاہ باب رقم کرنے والوں سے کوئی سمجھوتا ہو سکتا ہے نہ کوئی ڈیل ہو سکتی ہے۔

آرمی چیف نے کہا کہ کچھ لوگ مجرمانہ عناصر کے مذموم سیاسی مقاصد نہیں سمجھ سکے، انہیں منصوبہ سازوں نے اپنی خواہشات کا ایندھن بنایا، ان ورغلائے ہوئے افراد کو سپریم کورٹ کی ہدایات پر پہلے سے شک کا فائدہ دیا جا چکا ہے۔

اس گھناؤنے منصوبے کے اصل رہنما خود کو معصوم ظاہر کرتے ہیں، انہیں اب اپنے جرائم کا حساب دینا پڑے گا، خصوصاً جب ان کے ملوث ہونے کے واضح ثبوت ہیں۔ شہدا اور ان کے اہل خانہ یا ادارے کی بے حرمتی کرنے کی کسی کو اجازت نہیں دی جائے گی۔

آرمی چیف نے کہا کہ 9 مئی کے منصوبہ سازوں، سہولت کاروں، مجرموں کو قانون کے مطابق کٹہرے میں لایا جائے گا۔ اشتعال انگیزیوں کا جواب نہ دینے کو کمزوری اور ہمارے صبر کو لامحدود نہ سمجھا جائے۔

آرمی چیف نے کہا کہ دشمن قوتیں، ان کے سرپرست جھوٹ، جعلی خبروں اور پروپیگنڈے سے ڈیجیٹل ٹیررازم کر ر ہے ہیں۔ مسلح افواج اور پاکستانی عوام کے درمیان تفریق پیدا کرنے کی کوشش کی جا رہی ہے۔  قوم کی حمایت سے ان تمام قوتوں کے عزائم کو ناکام بنایا جائے گا۔

انہوں نے کہا کہ پاک فوج کا ہر سپاہی اور افسر اپنے فرائض اور ذمہ داریوں کو اوّلیت دیتا ہے، پاک فوج کا ہر سپاہی اور افسر روزانہ کی بنیاد پر قربانیاں دے رہا ہے۔

آئی ایس پی آر کے مطابق آرمی چیف نے افسران، جوانوں کو قوم کے لیے خدمات پیش کرنے، پیشہ ورانہ مہارت کو سراہا، آرمی چیف کو فارمیشن کی آپریشنل تیاریوں پر تفصیلی بریفنگ دی گئی، آرمی چیف نے مادر وطن کے لیے جانیں قربان کرنے والے شہدا کو خراج عقیدت پیش کیا اور یاد گار شہدا پر پھول رکھے، کور کمانڈر لاہور نے آرمی چیف جنرل عاصم منیر کا استقبال کیا۔