پاک فوج کے شعبہ تعلقات عامہ (آئی ایس پی آر) نے کہا ہے کہ بلوچستان کے ضلع خضدار میں سیکیورٹی فورسز نے انٹیلی جنس اطلاعات کی بنیاد پر کامیاب کارروائی کرتے ہوئے بارود سے بھری دو گاڑیاں تباہ کر دیں جبکہ انہیں چلانے والے 4 دہشت گرد بھی ہلاک کر دیے گئے۔
یہ بھی پڑھیں: دہشتگردی کے خلاف کارروائیاں جائز دفاع تھیں، پاکستان نے یوناما رپورٹ مسترد کر دی
آئی ایس پی آر کے مطابق 30 جولائی 2026 کو خضدار میں بھارتی سرپرستی میں کام کرنے والے دہشتگرد گروہ فتنہ الہندوستان کی موجودگی کی اطلاع پر انٹیلی جنس بیسڈ آپریشن کیا گیا۔
بیان میں کہا گیا ہے کہ کارروائی کے دوران سیکیورٹی فورسز نے بروقت کارروائی کرتے ہوئے بارودی مواد سے بھری 2 گاڑیوں (ویہیکل بورن امپرووائزڈ ایکسپلوسیو ڈیوائسز کی نقل و حرکت کا سراغ لگایا۔ فوری اور مؤثر کارروائی کے نتیجے میں دونوں گاڑیاں تباہ کر دی گئیں، جبکہ انہیں چلانے والے بھارت کے حمایت یافتہ 4 دہشتگرد بھی مارے گئے۔
آئی ایس پی آر کے مطابق علاقے میں کلیئرنس اور سرچ آپریشن جاری ہے تاکہ وہاں موجود کسی بھی دوسرے بھارتی سرپرستی میں کام کرنے والے دہشت گرد کو تلاش کرکے ختم کیا جا سکے۔
مزید پڑھیے: خیبر اور نوشکی میں سیکیورٹی فورسز کی کارروائیاں، 32 دہشتگرد ہلاک، آئی ایس پی آر
فوج کے شعبہ تعلقات عامہ نے مزید کہا کہ وفاقی ایپکس کمیٹی کے قومی ایکشن پلان کے تحت منظور کردہ عزم استحکام کے وژن کے مطابق پاکستان کی سیکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشتگردی کے مکمل خاتمے تک انسداد دہشت گردی کی کارروائیاں پوری قوت کے ساتھ جاری رکھیں گے۔
