پنجاب اسمبلی میں سانحہ 9 مئی کے خلاف مذمتی قرارداد منظور، اپوزیشن کا احتجاج

پنجاب اسمبلی نے سانحہ 9 مئی کے خلاف مذمتی قرارداد منظور کر لی گئی ہے، قرار داد کی منظوری کے دوران اسمبلی میں حکومتی اور اپوزیشن اراکین کے درمیان دھکم پیل ہوئی، اپوزیشن نے احتجاجاً قرارداد کی کاپیاں پھاڑ کر پھینک دیں۔

جمعرات کو پنجاب اسمبلی میں سانحہ 9 مئی سے متعلق قرارداد وزیر پارلیمانی امور پنجاب مجتبیٰ شجاع الرحمان نے پیش کی تھی، جسے اسپیکر اسمبلی نے اکثریت رائے سے منظور کر لیا۔

قرار داد میں سانحہ 9 مئی کی مذمت کرتے ہوئے کہا گیا ہے کہ 9 مئی کا دن انتہائی دلخراش ہے اس روز شرپسند عناصر نے وطن عزیز کے اداروں کے خلاف سیاسی لبادہ اوڑھ کر حملہ کیاگیا، 9 مئی کو قومی سلامتی کے اداروں اور شہدا کی یادگاروں کی بے حرمتی کی گئی۔

قرارداد میں کہا گیا ہے کہ بانی پاکستان قائد اعظم کی رہائش گاہ کو نذر آتش کیاگیا، وطن عزیزی کی ساکھ کو بین الاقوامی سطح پر نقصان پہنچانے کی کوشش کی گئی تاہم قومی اداروں نے سازش کو ناکام بناکر ملک کو بڑی تباہی سے بچا لیا۔

قرارداد میں کہا گیا ہے کہ ایوان مطالبہ کرتا ہے کہ سانحہ 9 مئی کے ذمہ داران و منصوبہ سازوں کو کیفر کردار تک پہنچایا جائے۔

دوسری جانب قرارداد کی منظوری کے دوران حکومت اور اپوزیشن کے ارکان آمنے سامنے  آ گئے ، اپوزیشن ارکان نشستوں سے اٹھ کر اسپیکر کے ڈائس کے پاس پہنچ گئے، اپوزیشن نے قرارداد کی کاپیاں پھاڑ کر ایوان میں لہرا دیں، اس دوران حکومتی اور اپوزیشن ارکان میں دھکم پیل بھی ہوئی۔