بیرسٹر گوہر نے کہا کہ کسی اور پارٹی نے کبھی انٹرا پارٹی الیکشن نہیں کرائے، سیکڑوں پارٹیوں میں سے صرف ہم سے ہیہ نشان لیا گیا، ہماری پارٹی کو ختم کرنے کے بہانے ڈھونڈے گئے۔ اس کے باوجود عمران خان پاکستان کی خاطر آگے بڑھنے اور سب کو معاف کرنے کے لیے تیار ہیں۔
مزید پڑھیں
قومی اسمبلی میں اجلاس کے دوران خطاب کرتے ہوئے چیئرمین تحریک انصاف بیرسٹر گوہر نے کہا کہ 9مئی کی باتیں کرنے والے یہ بھول گئے ہیں کہ پارلیمنٹ ہاؤس اور سپریم کورٹ پر حملہ کرنے والے یہ خود تھے، ڈان لیکس اور پانامہ میں ان کا ہی نام آیا تھا۔
چیئرمین تحریک انصاف نے کہا کہ آئین پاکستان اور اس ملک کی خاطر ہم آگے بڑھنا چاہتے ہیں، بانی پی ٹی آئی سب کو معاف کرنے کے لیے تیار ہیں۔ لیکن یہ لوگ لیڈر کو جیل میں رکھ کر کہتے ہیں کہ قانون کی بالادستی چاہتے ہیں۔ تمام تھانوں میں ہمارے خلاف مقدمات درج ہیں۔
انہوں نے کہا کہ ہم نے اس ملک کی جمہوریت کو مضبوط کرنے کے لیے یہ آواز اٹھائی، عوام نے بھرپور ہمارا ساتھ دیا۔ انتخابات میں زیادتیوں کے باوجود ہمیں 90 سیٹیں ملیں، سابق نگراں وزیر اعظم انوار الحق کاکڑ نے ٹھیک کہا ہے فارم 47 نہ ہوتے تو ہماری 180 سیٹیں ہوتیں۔
ان کا کہنا تھا کہ ہم چاہتے ہیں عدلیہ آزاد ہو، تاکہ انصاف لینے کے لیے 45 سال نہ لگیں، ہمارے لیڈر کو جیل میں رکھ کر آپ کہتے ہیں قانون کی بالادستی کریں اور دوسری جانب جس شخص کا لندن آنا اور جانا متنازع تھا اس کو بری کر دیا گیا۔
گوہر خان نے کہا کہ ہم وہ پاکستان چاہتے ہیں جس میں جمہوریت ہو، آزاد عدلیہ ہو، گھروں میں کیمرے نہ لگے ہوں تاکہ بروقت انصاف مل سکے۔ ذاتی مفادات سے بالاتر ہو کر قوم و عوام کی خاطر ہم آگے بڑھنے کے لیے تیار ہیں، کیونکہ پاکستان کی عوام جان چکی ہے کہ اصل جمہوری لوگ کون ہیں۔
