عازمین حج کے لیے سعودی حکومت کی جاری اصلاحات مثالی ہیں، وزیر مذہبی امور چوہدری سالک

وفاقی وزیر مذہبی امور چوہدری سالک حسین کی سعودی وزیر حج و عمرہ ڈاکٹر توفیق بن فوزان الربیعہ سے ملاقات ہوئی ہے۔

ملاقات میں دوطرفہ تعلقات اور حج 2024 کے انتظامات کے حوالے سے تفصیلی گفتگو ہوئی۔

ملاقات میں ایڈیشنل سیکریٹری ڈاکٹر عطاالرحمٰن اور ڈی جی حج عبد الوہاب سومرو بھی شامل تھے۔

اس موقع پر وزیر مذہبی امور چوہدری سالک حسین نے کہاکہ عازمین حج کو خدمات کی فراہمی کے لیے سعودی حکومت کے بہترین تعاون پر شکر گزار ہیں۔

انہوں نے کہاکہ سعودی عرب کی عازمین حج کی خدمت کے لیے جدت پسندی خوش آئند ہے۔ عازمین حج کے لیے سعودی حکومت کی جاری اصلاحات مثالی ہیں۔

وزیر مذہبی امور نے کہاکہ مکہ اور مدینہ میں نئے پاکستان ہاؤس سے متعلق مثبت پیش رفت ہے۔ سعودی وزارت حج و عمرہ کی قیادت میں خدمات کی فراہمی کی ذمہ دار سعودی کمپنیاں عمدہ کام کررہی ہیں۔

انہوں نے 40 ہزار پرائیویٹ عازمین حج کے ٹرانسپورٹ معاہدات زیر التوا ہونے پر اظہار تشویش کیا۔

چوہدری سالک نے کہاکہ سعودی وزارت حج نے توقع ظاہر کی ہے کہ حج گروپ آپریٹرز تمام معاہدات اگلے 4 روز میں مکمل کریں گے۔

انہوں نے کہاکہ پاکستان کے حج گروپ آپریٹرز اصلاحات کریں اور سعودی ہدایات پر من و عن عمل کریں۔ اگر نجی حج گروپ آپریٹرز کی تاخیر کے باعث ان کے حجاج کو زحمت ہوئی تو وزارت ایکشن لے گی۔