ملک بھر میں ٹیکس گوشوارے جمع نہ کرانے والے نان فائلرز کی موبائل سمز بلاک کرنے کا سلسلہ جاری ہے، 10 مئی سے شروع ہونیوالے اس کریک ڈاؤن میں اب تک 85 ہزار نان فائلرز کی موبائل فون سمز بلاک اور 14 ہزار سے زائد بحال بھی کی جاچکی ہیں۔
مزید پڑھیں
فیڈرل بورڈ آف ریونیو یعنی ایف بی آر کے ذرائع کے مطابق نان فائلرز کی جانب سے ٹیکس گوشوارے جمع کرانے اور ایکٹو ٹیکس پیئر لسٹ میں نام آ جانے پر 14 ہزار سے زائد شہریوں کی بلاک موبائل فون سمز بحال بھی کردی گئی ہیں۔
ایف بی آر اور ٹیلی کام آپریٹرز کے درمیان اتفاق ہونے کے بعد 10 مئی سے نان فائلرز کیخلاف کریک ڈاؤن کرتے ہوئے متعلقہ شہریوں کی موبائل فون سمز بلاک کرنے کا آغاز کیا گیا تھا۔
ایف بی آر حکام کے مطابق ٹیلی کام آپریٹرز کو روزانہ کی بنیاد پر مزید 5 ہزار نان فائلرز کی سمیں بلاک کرنے کی تفصیلات ٹیلی کام آپریٹرز کو مہیا کر رہے ہیں، اب تک 90 ہزار نان فائلرز کا ڈیٹا فراہم کیا گیا ہے جس میں سے 85 ہزار شہریوں کی موبائل فون سمز بلاک کی جا چکی ہیں۔
ایف بی آر حکام کا کہنا ہے کہ ٹیکس گوشوارے جمع کرانے اور ایکٹو ٹیکس پیئر لسٹ میں نام آ جانے کے بعد مذکورہ شخص کی بلاک سم بحال کر دی جاتی ہے، اس وقت تک 14 ہزار سے زائد موبائل سمز بحال کی جا چکی ہیں۔
واضح رہے کہ حکومت کی جانب سے زیادہ سے زیادہ افراد کو ٹیکس نیٹ میں شامل کرنے کے لیے اقدامات اٹھانے کی ہدایات جاری کیے جانے کے بعد ایف بی آر نے ملک بھر میں 24 لاکھ نان فائلرز کی موبائل سمز بلاک کرنے کا اعلان کیا تھا۔
ایف بی آر کے اس فیصلے پر ٹیلی کام آپریٹرز نے خاصا احتجاج کیا تھا، تاہم بعد میں اتفاق کیا گیا کہ یکدم 24 لاکھ مبینہ ٹیکس نادہندگان شہریوں کی موبائل فون سمز بند کرنے کے بجائے روزانہ 5 ہزار سمز بلاک کی جائیں گی۔