قربانی کا جانور خریدنے سے پہلے موبائل فون سے اس کی عمر کیسے معلوم کی جاسکتی ہے؟

عید قربان پر سنت ابراہیمی کی ادائیگی سے قبل اہم مرحلہ قربانی کے جانور کی خریداری ہے اور یہ اتنا سنجیدہ معاملہ ہے کہ ہر شخص یہ چاہتا ہے کہ کسی ایکسپرٹ کو ساتھ ضرور لے کر جائے جو بے عیب اور عمر میں پورا جانور دلوا سکے لیکن ٹیکنالوجی نے اب یہ مسئلہ بھی حل کردیا ہے کیوں کہ اب صرف آپ کے جیب میں موجود موبائل ہی آپ کو بتا دے گا کہ جانور کھیرا ہے، 2 دانت کا ہے یا اس سے بھی بڑا ہے۔

اس ایپ کے ذریعے نہ صرف جانور کی عمر کا تعین کیا جاسکتا ہے بلکہ اس کی مدد سے جانور کو چوری ہونے سے بھی بچایا جاسکتا ہے۔

اینیمل پاسپورٹ

ڈاکٹر سید عمید احمد نے وی نیوز کو بتایا کہ ہم نے اینیمل پاسپورٹ کے نام  سے ایک نیا فیچر متعارف کرادیا ہے جس سے ہم کسی بھی جانور کی عمر معلوم کرسکتے ہیں اکثر یہ مسئلہ درپیش آتا ہے کہ نوجوان منڈی جاتے ہیں اور غلطی سے کم عمر جانور لے آتے ہیں۔

جانور کی عمر کا تعین اس کے دانتوں کے ذریعے کیا جاتا ہے

ڈاکٹر عمید بتاتے ہیں کہ اینیمل سائنس سے معلوم ہوتا ہے کہ جانوروں کی عمر کا تعین ان کے دانتوں سے ہوتا ہے اور وہ اس سلسلے میں ایک فیچر متعارف کراچکے ہیں جو استعمال میں نہایت آسان ہے۔

استعمال کا طریقہ

ڈاکٹر عمید کہتے ہیں کہ اس فیچر کو استعمال کرنا انتہائی آسان ہے اس میں بس آپ کو جانور کے 2 دانتوں کی تصویر لینی ہوتی ہے اور الگوریتھم بتادے گا کہ اس جانور کی عمر کتنی ہے۔ وہ کہتے ہیں کہ بحیثیت پی ایچ ڈی اسکالر میں چاہتا ہوں کہ اپنی تعلیم اور مہارت ملک اور اس میں رہنے والوں کے لیے استعمال کروں۔

ان کا مزید کہنا تھا کہ انہوں نے پہلے جانور کو چوری ہونے سے روکنے کے لیے کام کیا اور اب لوگوں کو دھوکے سے بچانے کے لیے عمر کے تعین کا مسلئہ بھی حل کردیا ہے۔

ایپ میں غلطی کے امکانات بہت کم ہیں، ڈاکٹر سید عمید احمد

ڈاکٹر عمید کہتے ہیں کہ اس وقت ہم دنیا میں اس ٹیکنالوجی میں لیڈ کر رہے ہیں اور ابھی اس ایپ کا بیٹا ورژن ہے جو اینڈرائڈ فون کے پلے اسٹور سے ڈاؤن لوڈ کیا جا سکتا ہے۔

انہوں نے کہا کہ اس وقت ہزاروں جانوروں پر اس ایپ کو استعمال کیا جا چکا ہے اور اس میں غلطی کے امکانات بہت کم ہیں پھر بھی اگر کوئی غلطی ہوئی تو ہماری سپورٹ ٹیم 24 گھنٹے مستعد رہتی ہے۔