بھارتی فلم انڈسٹری بالی ووڈ کی معروف اداکارہ کاجول کے ساتھ نیٹ فلکس سیریز ’دی ٹرائل‘ میں جلوہ گر ہونے والی اداکارہ و ماڈل نور ملابیکا داس کی ممبئی کے ایک فلیٹ سے لاش برآمد ہوئی ہے۔
بھارتی میڈیا کے مطابق نور ملابیکا داس کے فلیٹ سے بدبو آنے پر ان کے پڑوسیوں نے پولیس کو اطلاع دی، اور پولیس کے وہاں پہنچنے پر معلوم ہوا کہ اداکارہ کمرے میں مردہ حالت میں پڑی ہوئی ہیں۔
مزید پڑھیں
اداکارہ نور ملابیکا داس کون تھیں؟
نور ملابیکا داس اداکاری سے قبل قطر ایئر ویز کے ساتھ بطور ایئر ہوسٹس منسلک رہیں، ان کا تعلق آسام سے تھا اور وہ ممبئی کے علاقے لوکھنڈ والا میں رہائش پذیر تھیں۔
وہ 2023 کی نیٹ فلکس سیریز ’دی ٹرائل‘ میں کاجول کے ساتھ جلوہ گر ہوئی تھیں۔
بھارتی میڈیا کا کہنا ہے کہ گزشتہ جمعرات کو ان کی لاش فلیٹ سے برآمد ہوئی تھی۔
پولیس کو شبہ ہے کہ اداکارہ نے اپنی زندگی کے خاتمے کے لیے خود کشی کی ہے، جبکہ واقعے کی مزید تحقیقات کے لیے گھر سے ادویات اور موبائل فون سمیت متعدد اشیا کے نمونے اکٹھے کیے گئے ہیں۔
دوسری جانب یہ بھی واضح رہے کہ اداکارہ کے فلیٹ سے کوئی ایسا خط یا نوٹ برآمد نہیں ہوا جس میں انہوں نے مبینہ خودکشی سے قبل کوئی پیغام دیا ہو۔
