محکمہ موسمیات نے رواں ہفتے ملک میں بارشوں کی پیشگوئی کی ہے اور اربن فلڈنگ کا خدشہ بھی ظاہر کیا ہے۔
محکمہ موسمیات کے مطابق رواں ہفتے ملک کے بالائی اور وسطی علاقوں میں شدت کے ساتھ بارشیں ہوسکتی ہیں، اور طوفانی بارشوں سے روزمرہ کے معمولات بھی متاثر ہونے کا خدشہ ہے۔
مزید پڑھیں
محکمہ موسمیات نے بتایا ہے کہ موسلادھار بارش کے باعث پہاڑی ندی نالوں میں سیلابی صورتحال پیدا ہوسکتی ہے، اور اس سے سیالکوٹ، گوجرانوالہ، نارووال میں اربن فلڈنگ کا خدشہ ہے۔
محکمہ موسمیات کے مطابق 2 جولائی سے 7 جولائی تک میرپور کشمیر، اسلام آباد، سرگودھا، بہاولپور اور ڈی جی خان میں تیز ہواؤں اور گرج چمک کے ساتھ بارشوں کا امکان ہے۔
محکمہ موسمیات نے بتایا ہے کہ 3 جولائی سے 7 جولائی تک بلوچستان کے بیشتر علاقوں میں موسم گرم اور مرطوب رہے گا، جبکہ مشرقی علاقوں میں گرج چمک کے ساتھ بارش ہوسکتی ہے۔
محکمہ موسمیات کے مطابق 4 جولائی سے 7 جولائی تک سندھ میں موسم گرم رہے گا، تاہم مٹھی، عمر کوٹ، سکھر، لاڑکانہ میں گرج چمک کے ساتھ بارش کا امکان ہے۔
محکمہ موسمیات نے بتایا کہ رواں ہفتے کے دوران گلگت بلتستان میں مطلع ابر آلود رہنے کے علاوہ بارش کا بھی امکان ہے۔
