سابق وزیراعظم پاکستان شاہد خاقان عباسی نے کہا ہے کہ کل ایک بجے اسلام آباد میں پروگرام رکھا ہے جس میں ’عوام پاکستان پارٹی‘ لانچ کردی جائے گی۔
نجی ٹی وی سے گفتگو کرتے ہوئے انہوں نے کہاکہ مصطفیٰ نواز کھوکھر جلد ہماری پارٹی کا حصہ ہوں گے، ہم نے جماعت بناتے وقت افراد اکٹھے نہیں کیے۔
سابق وزیراعظم نے کہاکہ ہم نے جماعت میں شمولیت کے لیے ابھی تک کسی سے رابطہ نہیں کیا، جو بھی ہماری سوچ سے مطابقت رکھے گا ہم اس کے ساتھ چل سکتے ہیں۔
یہ بھی پڑھیں شاہد خاقان عباسی کو پارٹی نے عزت دی، ناراضی بنتی نہیں تھی، ایاز صادق
شاہد خاقان عباسی نے کہاکہ مسلم لیگ ن کا نظریہ ووٹ کو عزت دو کا تھا جب وہ اس سے ہٹ گئی تو میں نے ساتھ چھوڑ دیا۔ ’یہ ملک کبھی آئین کے تحت چلا ہی نہیں‘۔
واضح رہے کہ شاہد خاقان عباسی 3 دہائیوں سے زیادہ عرصہ تک مسلم لیگ ن کے ساتھ وابستہ رہے، اور 2017 میں نواز شریف کی نااہلی کے بعد وزارت عظمیٰ کے منصب پر فائز ہوئے۔
حالیہ عام انتخابات سے قبل جب مسلم لیگ ن نے مریم نواز کو پارٹی کا سینیئر نائب صدر بنایا تو شاہد خاقان کے پارٹی کے ساتھ اختلافات پیدا ہوگئے تھے جس کی بنیاد پر انہوں نے عام انتخابات میں حصہ ہی نہیں لیا اور نہ ہی کسی جماعت کی سپورٹ کا اعلان کیا۔
یہ بھی پڑھیں پارٹی جوائن کرنے پر مفت ’کوکومو‘ مانگنے والوں کو مفتاح اسماعیل نے کیا جواب دیا؟
اب وہ سابق وفاقی وزیر خزانہ مفتاح اسماعیل کے ساتھ مل کر ’عوام پاکستان‘ کے نام سے پارٹی لانچ کرنے جارہے ہیں اور ان کا دعویٰ ہے کہ وہی پاکستانی عوام کے مسائل کو سمجھتے ہیں اور حل بھی کرسکتے ہیں۔
