اسپیکر قومی اسمبلی سردار ایاز صادق نے کہا ہے کہ ہم سب کی خواہش اور کوشش تھی کہ نواز شریف وزیراعظم بنیں مگر ایسا نہ ہوسکا۔
نجی ٹی وی سے گفتگو کرتے ہوئے انہوں نے کہاکہ 2017 میں سازش کے ذریعے نواز شریف کو نااہل کیا گیا، شہباز شریف کے لیڈر بھی نواز شریف ہی ہیں، پارٹی میں کوئی گروپنگ نہیں۔
مزید پڑھیں
انہوں نے کہاکہ پارٹیوں میں لوگ آتے اور جاتے رہتے ہیں اس سے فرق نہیں پڑتا۔
ایاز صادق نے کہاکہ شاہد خاقان عباسی کو پارٹی نے بہت عزت دی، نواز شریف نے ضمنی الیکشن میں اپنی سیٹ شاہد خاقان عباسی کو دی، اتنا کچھ کرنے کے باوجود ناراضی بنتی نہیں تھی۔
اسپیکر قومی اسمبملی نے کہاکہ نواز شریف کی وطن واپسی پر شاہد خاقان عباسی کو نواز شریف کے استقبال کے ایئرپورٹ پر موجود ہونا چاہیے تھا۔
ایک سوال کے جواب میں انہوں نے کہاکہ نیب نے کاروباری افراد اور بیوروکریسی کو یقین دہانی کرائی ہے کہ ہم آپ کی تذلیل نہیں کریں گے، یہ ماضی والی نیب نہیں ہے۔
