پاکستان تحریک انصاف (پی ٹی آئی) کا اسلام آباد میں قائم مرکزی دفتر ایک بار پر سیل کردیا گیا۔
میٹرو پولیٹن کارپوریشن (ایم سی آئی) کی جانب سے پی ٹی آئی کو نوٹس جاری کیا گیا جس میں بتایا گیا ہے کہ پی ٹی آئی کا مرکزی دفتر فائر اینڈ لائف سیفٹی انتظامات نہ ہونے کے باعث سیل کیا گیا ہے۔
یہ بھی پڑھیں: اسلام آباد: پی ٹی آئی کا مرکزی دفتر ایک بار پھر سیل
ایم سی آئی نے اپنے نوٹس میں کہا ہے کہ مذکورہ دفتر نے اسلام آباد اسٹینڈرڈز فار فائر پروٹیکشن اور لائف سیفٹی پالیسی 2010ء کے مطابق ابھی تک عملدرآمد نہیں کیا، دفتر میں آگ بجھانے کے آلات، الارم سسٹم، دھویں کے اخراج کے انتظامات سمیت دیگر حفاظتی اقدامات نہیں کیے گئے۔
نوٹس میں یہ بھی کہا گیا ہے کہ پی ٹی آئی مرکزی دفتر میں ایمرجنسی سسٹم کے لیے انڈیپنڈنٹ پاور سورس، گیس کے لیے حفاظتی اقدامات، آسمانی بجلی سے بچاؤ کے انتظامات نہیں کیے گئے اور الیکٹرک وائرنگ بھی معیاری نہیں۔
یہ بھی پڑھیں: اسلام آباد: پی ٹی آئی کا مرکزی سیکرٹریٹ سیل کردیا گیا
واضح رہے کہ پی ٹی آئی کے مرکزی دفتر کو تیسری مرتبہ سیل کیا گیا ہے۔ اس سے قبل 23 مئی کو وفاقی ترقیاتی ادارے (سی ڈی اے) نے اسلام آباد پولیس کی بھاری نفری کے ہمراہ پی ٹی آئی کے اسلام آباد کے سیکٹر G-8/4 میں واقع پارٹی کے مرکزی دفتر پر چھاپہ مارا تھا اور اسے سیل کردیا تھا۔
اس آپریشن کے دوران غیرقانونی تعمیرات کو منہدم جبکہ پی ٹی آئی رہنما عامر مغل کو گرفتار کرکے نامعلوم مقام پر منتقل کردیا گیا تھا۔ سی ڈی اے حکام کے مطابق پلاٹ پر بلڈنگ بائی لاز کی خلاف ورزی کرتے ہوہے اضافی منزل بھی تعمیر کی گئی تھی۔
اسلام آباد پولیس نے پی ٹی آئی کے مرکزی دفتر کو رواں برس 31 جنوری کو بھی سیل کیا تھا۔ اس روز پی ٹی آئی کا جنرل باڈی اجلاس طلب کیا گیا تھا تاہم اجلاس سے قبل ہی پولیس نے پی ٹی آئی سیکرٹریٹ آفس کو سیل کردیا تھا۔
