جماعت اسلامی پاکستان کے امیر حافظ نعیم الرحمان نے کہا ہے کہ بنگلہ دیش میں 15 سالہ دورِجبر اور بھارت نواز حکومت کا خاتمہ ہوا۔
سماجی رابطے کی سائٹ ’ایکس‘ پر اپنے ایک بیان میں انہوں نے کہاکہ حسینہ واجد نے بھارت کی مدد سے عوام اور ان کی آواز کو دبا کر حکومت کی۔
یہ بھی پڑھیں بنگلہ دیش: شیخ حسینہ واجد مستعفی، آرمی چیف کا مخلوط عبوری حکومت بنانے کا اعلان
امیر جماعت اسلامی نے کہاکہ حسینہ واجد نے اپنے ہم وطنوں کو اپنا مخالف بنالیا، اور اس کی فاشسٹ حکومت کا خاتمہ بنگلہ دیشی عوام کی قربانیوں اور جدوجہد کے نتیجے میں ہوا۔
حافظ نعیم الرحمان نے کہاکہ دعا ہے بنگلہ دیش کے عوام کی جدوجہد ملک میں استحکام کا سبب بنے، بنگلہ دیش میں خوشحالی اور حقیقی جمہوریت کی واپسی کے لیے دعا گو ہوں۔
واضح رہے کہ بنگلہ دیش کی وزیراعظم حسینہ واجد ملک میں جاری احتجاج کے باعث پیدا ہونے والی صورتحال کے باعث مستعفی ہوکر بھارت چلی گئی ہیں۔
یہ بھی پڑھیں بنگلہ دیش میں شیخ مجیب کے مجسمے پر عوام کا حملہ، ویڈیو وائرل
حسینہ واجد نے گزشتہ روز احتجاج کرنے والے طلبہ کو کچلنے کا حکم دیا تھا، تاہم آرمی چیف عوام کے ساتھ کھڑے ہوگئے اور حسینہ واجد کو استعفے پر مجبور کیا۔
