لاہور ہائیکورٹ کے جج نے فائروال کی تنصیب اور انٹرنیٹ سروس کی بندش کے خلاف دائر درخواست سننے سے معذرت کرلی۔
لاہور ہائیکورٹ کے جج جسٹس چوہدری محمد اقبال نے جوڈیشل ایکٹیوزم پینل کی جانب سے دائر کردہ درخواست پر سماعت سے معذرت کی ہے۔
یہ بھی پڑھیں: انٹرنیٹ بندش پر لاہور ہائیکورٹ نے وفاقی حکومت اور پی ٹی اے سے جواب طلب کرلیا
بعدازاں، عدالت نے مذکورہ درخواست کو جسٹس شکیل احمد کی عدالت میں منتقل کرنے اور آج ہی مقرر کرنے کا حکم دیتے ہوئے کہا کہ جسٹس شکیل احمد اسی نوعیت کی درخواستوں پر پہلے سے سماعت کررہے ہیں۔
جوڈیشل ایکٹیوزم پینل کی جانب سے دائر کی گئی درخواست میں مؤقف اپنایا گیا ہے کہ حکومت نے پیشگی نوٹس اور وجہ بتائے بغیر انٹر نیٹ اور سوشل میڈیا ایپس بند کر دی گئی ہیں۔
یہ بھی پڑھیں: فائروال کی تنصیب اور انٹرنیٹ کی بندش کیخلاف اسلام آباد ہائیکورٹ میں درخواست دائر
درخواست میں لاہور عدالت سے ملک میں انٹرنیٹ کو فوری اور مکمل طور پر بحال کرنے کے احکامات جاری کرنے کی استدعا کی گئی ہے۔
واضح رہے کہ گزشتہ ہفتے شہری ندیم سرور نے ملک میں انٹرنیٹ کی بندش کے خلاف لاہور ہائیکورٹ میں درخواست دائر کی تھی، درخواست گزار کا مؤقف تھا کہ انٹرنیٹ کی بندش سے وکلا، سمیت عام شہریوں کو مشکلات کا سامنا ہے۔
لاہور ہائیکورٹ کے جسٹس شکیل احمد نے درخواست کا محفوظ فیصلہ جاری کرتے ہوئے وفاقی حکومت سمیت دیگر فریقین سے جواب طلب کیا تھا اور آئندہ سماعت پر وفاقی حکومت، وزارت اطلاعات اور پی ٹی اے کے ایک ایک نمائندے کو طلب کیا تھا۔
