بھارتی کرکٹ ٹیم کے سابق کپتان اور اسٹار بلے باز ویرات کوہلی کی اہلیہ و بالی ووڈ سُپر اسٹار انوشکا شرما کا کہنا ہے کہ وہ اور ان کے شوہر ویرات کوہلی اپنے بچوں کے لیے کھانا خود بناتے ہیں۔
انوشکا شرما 4 ستمبر کی صبح ہندوستان واپس آئیں اور ممبئی میں ایک تقریب میں شرکت کی۔ تقریب میں نجی زندگی کے بارے میں بات کرتے ہوئے انوشکا شرما نے کھانا پکانے کی خاندانی ترکیبیں اگلی نسل تک پہنچانے کی اہمیت پر زور دیا۔ انہوں نے بتایا کہ وہ اور ان کے شوہر ویرات کوہلی کس طرح اپنے بچوں وامیکا اور اکائے کے لیے کھانا تیار کرتے ہیں۔
یہ بھی پڑھیں: کوہلی اور بچوں کے بغیر انوشکا کی بھارت واپسی نے نئی بحث چھیڑ دی
انوشکا شرما نے تقریب سے خطاب کرتے ہوئے مزید کہا کہ انہوں نے گھر میں یہ بحث کی تھی کہ اگر وہ اپنی ماں کے بنائے گئے کھانوں کو اپنے گھر میں نہیں بنائیں گے تو کھانے کی یہ ترکیبیں اپنے بچوں تک کبھی نہیں پہنچا سکیں گے۔ اس لیے اپنے گھر میں کبھی کھانا وہ بناتی ہیں تو کبھی ان کے شوہر ویرات کوہلی۔
بالی ووڈ اداکارہ کا کہنا تھا کہ وہ اپنی ماؤں کے کھانا بنانے کے طریقے کو نقل کرنے کی کوشش کرتے ہیں اور ایسا لگتا ہے کہ وہ اپنے بچوں کو کوئی قیمتی چیز دے رہے ہیں۔
انوشکا نے یہ بھی بتایا کہ بہت زیادہ سفر کرنے کے باوجود وہ اپنے بچوں کے لیے روز مرہ کے معمولات کیسے برقرار رکھتی ہے، انوشکا شرما کے مطابق زیادہ سفر کی وجہ سے ان کے بچے اپنی زندگیوں میں بہت سی تبدیلیوں کا تجربہ کرتے ہیں لیکن پھر بھی ان کے کھانے اور سونے کے اوقات مقرر ہیں جس سے انہیں خود کو بہتر طریقے سے منظم کرنے میں مدد ملتی ہے۔
یہ بھی پڑھیں: انوشکا شرما ویرات کوہلی کے کپڑے کیوں پہنتی ہیں؟
واضح رہے لندن منتقل ہونے کی افواہوں کے درمیان انوشکا اپنے بچوں اور ویرات کوہلی کے بغیر بھارت واپس آئی ہیں۔ یہ ان کے بیٹے آکائے کی پیدائش کے بعد ہندوستان کا دوسرا دورہ ہے۔ وہ اس سے قبل مئی میں آئی پی ایل کے لیے ہندوستان آئی تھیں۔
انوشکا شرما 2018 میں ریلیز ہونے والی فلم ’زیرو‘ کے بعد سے کسی فلم میں نظر نہیں آئیں۔ توقع ہے کہ وہ فلم ’چکدا ایکسپریس‘ کے ساتھ واپس آئیں گی جو کرکٹر جھولن گوسوامی کے بارے میں ایک اسپورٹس بائیوپک ہے۔ ’چکدا ایکسپریس‘ کی فلم بندی حال ہی میں مکمل ہوئی ہے اور اس کی ریلیز کی تاریخ کا مداحوں کو بے صبری سے انتظار ہے۔
فلم ’چکدا ایکسپریس‘ کو او ٹی ٹی پلیٹ فارم نیٹ فلیکس پر ریلیز کیا جائے گا۔ فلم کی ریلیز کا اعلان تاحال نہیں کیا گیا۔
