سینیئر سیاستدان و سابق وفاقی وزیر شیریں مزاری نے بھی افغان قونصل جنرل کی جانب سے قومی ترانے کی بے ادبی کی مذمت کردی۔
سماجی رابطے کی سائٹ ’ایکس‘ پر اپنے ایک بیان میں انہوں نے کہاکہ وزیراعلیٰ خیبرپختونخوا علی امین گنڈاپور کی جانب سے افغان قونصل جنرل کے اقدام کا دفاع مضحکہ خیز ہے۔
یہ بھی پڑھیں پشاور: افغان قونصل جنرل نے سفارتی آداب کی دھجیاں اڑا دیں، قومی ترانے کے دوران کھڑے نہ ہوئے
انہوں نے کہاکہ سفارتی اصول ایک خاص قسم کے رویے کا مطالبہ کرتے ہیں، جس میں قومی ترانے اور میزبان ملک کے جھنڈے کا احترام کرنا شامل ہے۔
Absurd defence of the indefensible! Nothing to do with cultural differences. The Afghan cricket team stood attention when anthems were played. Diplomatic norms demand a certain type of behaviour including respecting national anthem & flag of host country.https://t.co/wHH8LHr6X8
— Shireen Mazari (@ShireenMazari1) September 18, 2024
واضح رہے کہ گزشتہ روز پشاور میں ایک تقریب کے دوران افغان قونصل جنرل قومی ترانے کے احترام میں کھڑے نہیں ہوئے تھے، اور ان کے ساتھی بھی سیٹ پر براجمان رہے۔
بعد ازاں افغان قونصلیٹ نے وضاحت جاری کرتے ہوئے کہا تھا کہ قومی ترانے میں میوزک کی وجہ سے قونصل جنرل کھڑے نہیں ہوئے، ایسا نہیں کہ وہ پاکستانی ترانے کا احترام نہیں کرتے۔ تاہم دفتر خارجہ نے افغان ناظم الامور کو طلب کرکے اس پر شدید احتجاج کیا تھا۔
آج وزیراعلیٰ خیبرپختونخوا علی امین گنڈاپور نے تقریب سے خطاب کے دوران کہاکہ ایسی کوئی بات نہیں کہ افغان قونصل جنرل نے پاکستان کے قومی ترانے کا احترام نہیں کیا، افغان قونصلیٹ نے کہہ دیا ہے کہ پاکستانی ترانے میں میوزک کی وجہ سے وہ کھڑے نہیں ہوئے۔
یہ بھی پڑھیں قومی ترانے کی بے ادبی، علی امین گنڈاپور افغان قونصل جنرل کے حق میں بول پڑے
وزیراعلیٰ علی امین گنڈاپور کی جانب سے افغان قونصل جنرل کے اقدام کا دفاع کرنے پر انہیں تنقید کا نشانہ بنایا جارہا ہے۔
