یونیسیف نے صبا قمر کو پاکستان میں بچوں کے حقوق کا سفیر مقرر کردیا

یونیسیف نے صبا قمر کو پاکستان میں بچوں کے حقوق کے لیے اپنا پہلا سفیر مقرر کر دیا، اداکارہ اپنے پلیٹ فارم کا استعمال بچوں کے حقوق اور نوجوانوں کو متاثر کرنے والے مسائل، جیسے بچوں کی شادی کے بارے میں بیداری پیدا کرنے میں مدد کرے گی۔

یونیسیف کی جانب سے صبا قمر کو سفیر بنانے کا اعلان بچیوں کے عالمی دن کے موقع پر کیا۔ اس دن کا مقصد لڑکیوں کے حقوق کی حمایت کرنا اور انہیں دنیا بھر میں درپیش انوکھے چیلنجوں کو تسلیم کرنا ہے۔

مزید پڑھیں: پاکستان سمیت جنوبی ایشیا میں بچوں کو گرمی سے شدید خطرہ لاحق ہے، یونیسیف

صبا قمر نے اہم ذمہ داری سنبھالنے کے بعد اپنے ایک بیان میں کہا کہ یونیسیف میں شامل ہونا اعزاز کی بات ہے۔ جہاں بھی ہوں ہر بچے کے لیے ہر حق کے حصول کے ہمارے مشترکہ مشن کی بازگشت کروں گی۔

’باقی ممالک کی نسبت پاکستان میں بچوں اور خواتین کو درپیش چیلنجز اور یونیسیف کی وقف کوششوں میں فرق دیکھا ہے۔ پاکستان کے بچوں اور نوجوانوں کے لیے اپنا کردار ادا کرنے کا وعدہ کرتی ہوں تاکہ وہ خواب دیکھ سکیں اور انہیں اپنے خوابوں کو پورا کرنے کا موقع ملے‘۔

یونیسیف پاکستان کی قومی سفیر کے طور پر صبا قمر کو اپنے پلیٹ فارم کا استعمال کرتے ہوئے بچوں کے حقوق اور نوجوانوں کو متاثر کرنے والے مسائل، جیسے کم عمری کی شادی، ذہنی صحت، تعلیم کی کمی، صنفی مساوات، موسمیاتی تبدیلی، تشدد، استحصال اور بچوں کی غربت کے اثرات اور ان کے بارے میں بیداری پیدا کرنے کا کردار ادا کرنا ہوگا۔

یونیسیف کی رپورٹ کے مطابق پاکستان میں 1کروڑ90لاکھ چائلڈ میرجز ہوئی ہیں، جوعالمی سطح پر چھٹے نمبر پر ہے۔ نصف سے زیادہ نوعمر لڑکیاں اپنی 18ویں سالگرہ سے پہلے حاملہ ہو جاتی ہیں جو ماں اور بچے کے لیے جان لیوا ثابت ہوسکتی ہیں۔

یہ بھی پڑھیں: پنجاب میں ہر سال 90 فیصد بچوں کو مختلف امراض سے بچاؤ کے ٹیکے لگائے جاتے ہیں، یونیسیف

پاکستان میں یونیسیف کے نمائندے عبداللہ فادل نے اس موقع پر اپنے تاثرات بیان کرتے ہوئے کہا کہ وہ صبا قمرکو یونیسف میں خوش آمدید کہتے ہیں۔ صبا قمر خواتین اور لڑکیوں کے حقوق کے لیے آواز اٹھانے کے لیے موزوں ہیں، وہ ایک بہادر اور مضبوط وکیل ہیں۔

انہوں نے مزید کہا کہ پاکستان میں بچوں کو درپیش سب سے بڑے چیلنجز کی طرف توجہ مبذول کرنے اور ہر بچے کو ان کی حقیقی صلاحیتوں تک پہنچنے میں مدد کرنے کے لیے اپنی کوششوں کو تیز کرنے کے لیے صبا قمر کے ساتھ قریبی تعاون کے منتظر ہیں۔

واضح رہے صبا قمر نے گزشتہ روز اپنے نئے سفر کے حوالے سے کچھ تصاویر شیئر کیں جن کے ساتھ کیپشن میں انہوں نے لکھا کہ اس ہفتے انتہائی حیرت انگیز لوگوں سے ملاقات ہوئی اور کچھ شاندار تجربات ہوئے۔ بہت جلد آپ لوگوں کے ساتھ شیئر کیے جائیں گے۔