جمعیت علما اسلام (جے یو آئی) کے سربراہ مولانا فضل الرحمان نے کہا ہے کہ ہمارے مسودے کے مطابق آئینی ترمیم ہوگی ورنہ ہوگی ہی نہیں، آئین سے کھلواڑ کیا گیا تو ہم سڑکوں پر ہوں گے۔
میرپور خاص سندھ میں مفتی محمود (مرحوم) کی برسی کے اجتماع سے خطاب کرتے ہوئے انہوں نے کہاکہ حکومت نے آئینی ترمیم کا جو مسودہ تیار کیا تھا اس میں آئین کو تباہ کرنے کی کوشش کی گئی تھی۔
یہ بھی پڑھیں مجوزہ آئینی ترمیم: خصوصی پارلیمانی کمیٹی اجلاس میں پی ٹی آئی اور پیپلزپارٹی ارکان میں تلخ کلامی
انہوں نے کہاکہ 1977 میں انتخابات میں دھاندلی کی تحریک چلی تھی جس کی قیادت مفتی محمود نے کی، پھر ہم نے 2018 کے الیکشن کو دھاندلی زدہ قرار دیا، اور 2024 کے جعلی انتخابات پر بھی کوئی سمجھوتا نہیں کیا۔
سربراہ جے یو آئی نے کہاکہ آئینی ترمیم پر میں نے تجویز دی تو سب میرے گھر آ کر بیٹھ گئے کہ ہمیں ووٹ دو، جن کے پاس کوئی مسودہ نہیں تھا وہ بھی ہم سے ووٹ لینے آئے تھے۔
مولانا فضل الرحمان نے کہاکہ رات کے اندھیرے میں کالے شاپر میں مسودہ آیا جس میں عوام کے حق سلب کرنے کی کوشش تھی، ہم نے اس مسودے کی مخالفت کی اور یہ حکومت وہ آئینی ترمیم منظور نہیں کرسکی۔
انہوں نے کہاکہ میں سیاست میں اس کالی داڑھی کے ساتھ داخل ہوا تھا اور داڑھی سفید ہوگئی ہے، مجھے کہا گیا کہ ہم نے کوئی دھاندلی نہیں کی تو ہم نے جواب دیا آپ کے علاوہ کوئی دھاندلی کر ہی نہیں سکتا۔
انہوں نے کہاکہ آج پاکستان ان حکمرانوں کی وجہ سے اسلامی قوانین سے محروم ہے، اب ان حکمرانوں کا محاصرہ اس عوام نے کرنا ہے۔
یہ بھی پڑھیں آئینی ترمیم : جے یو آئی کے بغیر حکومت کے نمبر پورے ہونا شرمناک ہوگا، کامران مرتضی
انہوں نے کہاکہ جو بھی ختم نبوت پر شب خون مارے گا، وہ اس ملک میں نہیں رہ سکے گا۔
