پاکستان تحریک انصاف( پی ٹی آئی ) کے چیئرمین بیرسٹر گوہر نے کہا ہے کہ جمعیت علمائے اسلام کے سربراہ مولانا فضل الرحمان سے ملاقات میں ہم تقریباً ایک اتفاق رائے پر پہنچ گئے ہیں، خصوصی کمیٹی نے مجوزہ آئینی ترامیم کا وہی مسودہ منظور کیا جس پر مولانا فضل الرحمان سے بات چیت چل رہی تھی۔
یہ بھی پڑھیں:آئینی ترمیم کا معاملہ: پارلیمنٹ کی خصوصی کمیٹی نے 26 نکات پر مشتمل مسودے کی متفقہ منظوری دے دی
جمعہ کو جمعیت علمائے اسلام کے سربراہ مولانا فضل الرحمان کے ساتھ ملاقات کے بعد میڈیا سے گفتگو کرتے ہوئے بیرسٹر گوہر خان نے بتایا کہ مولانا فضل الرحمان کے ساتھ ملاقات انتہائی خوشگوار ماحول میں ہوئی، ملاقات کے دوران ہی پتا چلا کہ خصوصی کمیٹی نے مجوزہ آئینی ترمیم کے مسودہ کو منظور کر لیا ہے۔
انہوں نے کہا کہ ہم اور مولانا فضل الرحمان ملاقات میں ایک اتفاق رائے پر پہنچ گئے ہیں، خصوصی کمیٹی میں ہمارے نمائندے عامر ڈوگر موجود تھے انہی سے معلوم ہوا کہ خصوصی کمیٹی نے وہی مسود منظور کیا ہے جس پر ہماری مولانا فضل الرحمان کے ساتھ بات چیت چل رہی تھی۔ ہمیں حکومت کی طرف سے چوتھا مجوزہ آئینی ترمیم کا مسودہ ملا تھا، ہم جلد کسی نتیجے پر پہنچ جائیں گے۔
مزید پڑھیں:اتفاق رائے ہوچکا، آئینی ترمیم کرکے دکھائیں گے، بلاول بھٹو
انہوں نے کہا کہ بانی پی ٹی آئی سے 2 ہفتے سے ملاقات نہیں کرنے دی جا رہی ہے، ہفتہ کے روز ملاقات کی کوشش کریں گے اور اس کے بعد اپنا حتمی مؤقف دیں گے۔
ایک سوال کے جواب میں انہوں نے کہا پیپلز پارٹی کے چیرمین بلاول بھٹو زرداری بھی مولانا فضل الرحمان سے ملاقات کے دوران دوسرے کمرے میں موجود تھے، جاتے ہوئے ان سے بھی سلام دعا ہوئی ہے۔
