نائب وزیراعظم و وزیر خزانہ اسحاق ڈار نے کہا ہے کہ پاکستان جیسے ترقی پذیر ممالک کے لیے کلائیمیٹ فنانسنگ اشد ضروری ہے، ترقی یافتہ ممالک 100 ارب ڈالر کی کلائیمیٹ فنانسنگ کا وعدہ پورا کریں۔
باکو میں سیلاب کی پیشگی اطلاعات اور بڑھتی حدت کے موضوع پر اعلیٰ سطح کی تقریب سے خطاب کرتے ہوئے انہوں نے کہاکہ ہم آبادیوں کے تحفظ کی کوشش میں متحد ہونے کے لیے پرعزم ہیں، پاکستان موسمیاتی تبدیلی سے شدید متاثرہ 10 ممالک میں شامل ہے۔
اسحاق ڈار نے کہاکہ آج دنیا کو عالمی حدت میں اضافے کا سامنا ہے، پاکسان محدود وسائل کے باوجود موسمیاتی تبدیلی سے نمٹنے کے لیے پُرعزم ہے۔
انہوں نے کہاکہ 2022 کے تباہ کن سیلاب نے 3 کروڑ سے زیادہ پاکستانیوں کو متاثر کیا، اور ہمیں 30 ارب ڈالر سے زیادہ کا نقصان ہوا۔
انہوں نے کہاکہ ہمارے پاس پیشگی اطلاع کا مؤثر نظام ہوتا تو سیلابی تباہی سے بچا جا سکتا تھا، آج بڑھتا ہوا درجہ حرارت اور بارشوں کے نظام میں بگاڑ بھی عالمی چیلنج ہے۔
انہوں نے کہاکہ سب کے لیے پیشگی اطلاع کے نظام سے متعلق پروگرام کے اجرا کو سراہتے ہیں، جس کے تحت 2027 تک کرہ ارض کے ہر فرد کا تحفظ یقینی بنانا ہے۔
یہ بھی پڑھیں موسمیاتی تبدیلی اور زراعت کو درپیش چیلنجز
اسحاق ڈار نے کہاکہ ہم کاربن اخراج کو نصف شرح تک لانے کے لیے پرعزم ہیں، گرین پاکستان پراجیکٹ میں تمام ماحول دوست اقدامات شامل ہیں۔
