وزیراعلیٰ پنجاب مریم نواز شریف نے اپنی بیماری سے متعلق افواہوں کی تردید کرتے ہوئے کہا ہے کہ وہ اپنی بیماری کے حوالے سے بات نہیں کرنا چاہتی تھیں لیکن انہیں اس بارے میں وضاحت پیش کرنے پر مجبور کیا گیا ہے۔
لندن میں نواز شریف کے ہمراہ پارٹی کارکنان سے گفتگو کرتے ہوئے مریم نواز نے کہا کہ ہم نے اپنے ملک کی خیر مانگنی ہے اور اس کے لیے دن رات ایک کرنا ہے، سیاست اور کاکردگی پر پر بات ہوسکتی ہے لیکن ذاتیات پر بات نہیں ہوسکتی، میں نے 9 ماہ دن رات کام کیا، مجھے پیراتھائرائڈ کا مسئلہ ہے، میری گزشتہ برس جنوری میں سرجری ہوئی تھی۔
یہ بھی پڑھیں: کیا مریم نواز گلے کے کینسر میں مبتلا ہیں؟
انہوں نے کہا کہ کہا جارہا ہے کہ پاکستان میں ایسا کوئی اسپتال نہیں جہاں یہ سرجری ہوسکتی، میرا سارا علاج پاکستان میں ہوا ہے لیکن پیراتھائرائڈ ایک ایسی بیماری ہے جس کا علاج دنیا کے صرف 2 ملکوں سوئٹزرلینڈ اور امریکا میں دستیاب ہے، اس کا برطانیہ میں بھی کوئی علاج نہیں۔
CM Punjab gave full details about her health and what’s the issue and why she went Switzerland pic.twitter.com/ZJbDTRRwca
— Haseeb Arslan (@HaseebarslanUK) November 13, 2024
مریم نواز نے کہا کہ میرے بارے میں ولاگز اور باتیں ہورہی ہیں کہ مجھے خدانخواستہ کینسر ہے، مجھے کینسر نہیں ہے، میں اپنی بیماری کے بارے میں بات کرنا نہیں چاہتی تھی کیونکہ میں نے اپنے والد سے خود کو مظلوم بنا کر پیش کرنا یا رونا دھونا نہیں سیکھا، مجھے آج مجبوراً یہ بات کرنا پڑی، میں اپنی کوئی بھی ذاتی بات میڈیا کے سامنے نہیں کرتی۔
یہ بھی پڑھیں: ’مریم نواز کا پرس نہ اٹھائیں تو کیا عوام کی خدمت کریں؟‘، مریم اورنگزیب تنقید کی زد میں کیوں؟
واضح رہے کہ وزیراعلیٰ پنجاب مریم نواز شریف چند دن قبل گلے کے علاج کے لیے جنیوا گئی تھیں، بعد سے ہی سوشل میڈیا پر خبریں زیرگردش تھیں کہ وہ گلے کے کینسر میں مبتلا ہیں۔ وی نیوز نے اس حوالے سے مسلم لیگ ن کے سینیئر رہنماؤں اور مریم نواز کے قریبی ساتھیوں سے رابطہ کیا تھا جنہوں نے بتایا کہ مریم نواز کے حوالے سے اس طرح کی بات بالکل بے بنیاد ہے۔
یاد رہے کہ اس سے قبل مریم نواز پی ڈی ایم دور حکومت میں بھی گلے کے علاج کے لیے جنیوا گئی تھیں، جہاں ان کے گلے کی سرجری بھی ہوئی تھی، اب دوبارہ گلے کے علاج کے لیے جنیوا جانے سے چند روز قبل وہ شریف میڈیکل اسپتال بھی گئی تھیں، جہاں پر انہیں ابتدائی طبی امداد دی گئی تھی۔
