ایف آئی اے سائبر کرائم ونگ بلوچستان زون نے سوشل میڈیا پر ریاست مخالف سرگرمیوں میں ملوث عناصر کی نشاندہی کی ہے اور مذکورہ اکاؤنٹس کے حوالے سے تفصیلات پاکستان ٹیلی کمیونیکیشن اتھارٹی کو ارسال کردی ہیں۔
ایف آئی اے کی جانب سے جاری اعلامیے کے مطابق ایف آئی اے سائبر کرائم ونگ بلوچستان کے ڈائریکٹر عمران محمود کی سربراہی میں سوشل میڈیا پر ریاست مخالف پروپیگنڈے میں ملوث عناصر کی نشاندہی کی جارہی ہے۔
یہ بھی پڑھیں ریاست کے خلاف پروپیگنڈا: وزیراعظم نے ذمہ داروں کا تعین کرنے کے لیے ٹاسک فورس قائم کردی
اعلامیے میں کہا گیا ہے کہ ڈائریکٹر سائبر کرائم ونگ ویسٹ عمران محمود کو 3 ماہ قبل تعینات کیا گیا تھا، سوشل میڈیا اکاؤنٹس کی مانیٹرنگ اور تجزیے کے لیے خصوصی ٹیم تشکیل دی گئی تھی۔
مذکورہ ٹیم نے جدید ٹیکنالوجی کی بنیاد پر فیس بک، انسٹاگرام، ایکس، ٹک ٹاک اور دیگر پلیٹ فارمز پر مشکوک سرگرمیوں کی نگرانی کی۔
گزشتہ 3 ماہ کے دوران ایف آئی اے سائبر کرائم ونگ بلوچستان نے ریاست مخالف مواد شیئر کرنے میں ملوث 924 سوشل میڈیا اکاؤنٹس کی نشاندہی کی۔
رپورٹ کردہ اکاؤنٹس میں 487 فیس بک، 190 ٹک ٹاک، 147 ایکس، 88 انسٹا گرام اور 12 دیگر ایپلیکیشن کے اکاؤنٹس شامل ہیں۔
اب تک 312 اکاؤنٹس کو پی ٹی اے کی جانب سے بلاک کیا گیا ہے، جبکہ ریاست مخالف عناصر کے خلاف 14 انکوائریاں درج کرکے تحقیقات کا آغاز کردیا گیا ہے۔
علاوہ ازیں ایف آئی اے سائبر کرائم بلوچستان نے 28 مختلف سوشل میڈیا ایپلیکیشنز کی نشاندہی کی ہے جنہیں ریاست مخالف عناصر کے ذریعے گمنام رابطوں اور پروپیگنڈے کے لیے استعمال کیا جا سکتا ہے۔
یہ بھی پڑھیں پولیس ریاست مخالف پروپیگنڈا مہم چلانے والے سوشل میڈیا نیٹ ورک تک پہنچنے میں کامیاب
ایف آئی کا کہنا ہے کہ ملزمان کی گرفتاری کے لیے تمام تر وسائل بروئے کار لائے جائیں گے۔ اور نشاندہی کے لیے جدید ٹیکنالوجی کو بروئے کار لایا جارہا ہے۔
