وزیرِ اعلیٰ خیبرپختونخوا علی امین گنڈاپور نے ڈی چوک احتجاج پر درج مقدمے کے خلاف اسلام آباد ہائیکورٹ سے رجوع کرلیا، علی امین گنڈاپور نے حاجی اجمل خان مہمند کے ذریعے درخواست دائر کی ہے۔
علی امین گنڈاپور کی جانب سے دائر درخواست میں مؤقف اپنایا گیا کہ ڈی چوک احتجاج پر 26نومبر کو درج مقدمے سے دہشتگردی کی دفعات کو ختم کیا جائے۔
مزید پڑھیں: علی امین گنڈاپور کی کنٹینر سے گرائے گئے کارکن سے ملاقات، ایسے لوگ ہی اصل ٹائیگر ہیں، وزیراعلیٰ
درخواست میں مؤقف اپنایا گیا کہ احتجاج کے لیے آئینی حق استعمال کیا ہے، جبکہ پولیس نے دہشتگردی کا مقدمہ درج کرلیا ہے۔ 26نومبر کو اسلام آباد کے تھانہ سیکریٹریٹ میں مقدمہ درج ہوا ہے۔
درخواست میں استدعا کی گئی کہ مقدمے سے دہشتگردی کی دفعات کو معطل یا ایف آئی آر پر کارروائی روکی جائے، حتمی ریلیف کے طور پر تھانہ سیکریٹریٹ میں درج مقدمے سے دہشتگردی کی دفعات نکالی جائیں۔
تاہم، ایس ایچ او تھانہ سیکریٹریٹ اور اسٹیٹ کو بذریعہ ایڈووکیٹ جنرل اسلام آباد فریق بنایا گیا ہے۔
یہ بھی پڑھیں: علی امین اور بشریٰ بی بی جس طرح بھاگے اس کی مثال نہیں ملتی، خواجہ آصف
واضح رہے علی امین گنڈاپور اور بشریٰ بی بی کی قیادت میں 24 سے 26 نومبر تک اسلام آباد میں احتجاج کیا گیا، اس دوران پی ٹی آئی کارکنان اور سیکیورٹی اداروں کے درمیان مزاحمت ہوئی جس کے بعد وزیر اعلیٰ علی امین گنڈاپور اور بشریٰ بی بی سمیت دیگر رہنماؤں پر مختلف مقدمات درج ہوئے۔
