ڈونلڈ ٹرمپ کا چینی صدر سے رابطہ، دونوں میں کیا باتیں ہوئیں؟

نومنتخب امریکی صدر ڈونلڈ ٹرمپ نے کہا کہ انہوں نے جمعہ کو چینی صدر شی جن پنگ کے ساتھ فون پر رابطہ کیا تھا اور ان کے ساتھ ٹک ٹاک، فینٹانل، تجارت اور دیگر معاملات پر گفتگو کی تھی۔

ڈونلڈ ٹرمپ نے ٹرتھ سوشل پر ایک پوسٹ میں کہا کہ یہ کال چین اور امریکا دونوں کے لیے بہت اچھی تھی۔ انہوں نے امید ظاہر کی کہ دونوں ملک مل کر فوری طور پر مختلف مسائل کو حل کریں گے۔

یہ بھی پڑھیں: ڈونلڈ ٹرمپ کی تقریب حلف برداری، کب کیا ہوگا، دیکھا کیسے جاسکتا ہے؟

ٹرمپ کا کہنا تھا کہ ہم نے تجارت، فینٹانل، ٹک ٹاک سمیت مختلف معاملات میں توازن قائم کرنے پر تبادلہ خیال کیا۔ انہوں نے کہا، ’صدر شی جن پنگ اور میں دنیا کو مزید پرامن اور محفوظ بنانے کے لیے ہر ممکن کوشش کریں گے‘۔

خبر رساں ادارے روئٹرز نے چینی سرکاری نشریاتی ادارے سی سی ٹی وی کا حوالہ دیتے ہوئے بتایا کہ کال کے بعد چینی صدر نے کہا کہ انہوں نے اور ڈونلڈ ٹرمپ نے امریکا اور چین کے تعلقات میں مزید پیش رفت کی امید ظاہر کی ہے۔

یہ بھی پڑھیں: امریکا ٹک ٹاک پر پابندی کیوں لگانا چاہتا ہے؟

واضح رہے کہ ٹک ٹاک کے بارے میں چینی صدر کے ساتھ ٹرمپ کی بات چیت امریکی سپریم کورٹ کی جانب سے اس حوالے سے بنائے گئے قانون کی توثیق کرنے سے کچھ دیر پہلے سامنے آئی ہے۔ اس قانون کے تحت امریکا میں مقبول ویڈیو شیئرنگ ایپ ٹک ٹاک پر پابندی عائد کی جائے گی۔ یہ قانون اتوار سے لاگو ہوگا۔

یاد رہے کہ ڈونلڈ ٹرمپ نے 5 نومبر کے انتخابات میں نائب صدر کملا ہیرس کو شکست دینے میں ٹک ٹاک کے کردار کو سراہا تھا، تاہم اب وہ پیر کو اپنے عہدے کا حلف اٹھا کر ٹک ٹاک پر عائد پابندی کو کیسے ہٹائیں گے، یہ آنے والا وقت ہی بتائے گا۔