پاکستان تحریک انصاف (پی ٹی آئی) کے مرکزی رہنما و سابق ڈپٹی اسپیکر قومی اسمبلی قاسم سوری نے کہا ہے کہ سپریم کورٹ نے پنجاب میں انتخابات کا حکم دیا ہے لیکن وفاقی حکومت سیکیورٹی اور دیگر بہانے بنا کر انتخابات سے فرار ہونے کی کوشش کر رہی ہے۔
کوئٹہ میں پریس کانفرنس کرتے ہوئے قاسم سوری کا کہنا تھا کہ عدالت نے سیاسی جماعتوں کو مل بیٹھ کر مشاورت کرنے کا کہا ہے لیکن ہمارے رہنماؤں کو گرفتار کیا جارہا ہے۔ بات چیت کے لیے پہلے ماحول بنایا جاتا ہے دباؤ ڈال کر مذاکرات نہیں ہو سکتے۔
قاسم سوری نے کہا کہ مردم شماری میں بلوچستان کی آبادی 47 فیصد زیادہ جبکہ کوئٹہ کی آبادی 17 فیصد کم کردی گئی ہے اس لیے ضروری ہے کہ صوبے میں مردم شماری صاف و شفاف طریقے سے کرنے کے لیے ایک ماہ کی توسیع کی جائے۔
پی ٹی آئی رہنما نے کہا کہ ملک میں عام قانون بنا کر چیف جسٹس کو بلیک میل کیا جارہا ہے۔ سپریم کورٹ کا حکم نہ ماننے کا مطلب یہ ہے کہ ملک میں جنگل کا قانون ہے۔ ہر کوئی پاکستان میں آئین و قانون کی پاسداری چاہتا ہے۔
