جامعہ کراچی سے تعلیم حاصل کرنے والے طالب علموں کی تنظیم کمک نے اس بار پھر بچوں کے لیے عید کی خریداری کرائی۔ درجن بھر مرد و خواتین پر مشتمل منتظمین کی ایک ٹیم 100 بچوں کو اسکول سے اپنی اپنی گاڑیوں میں بٹھا کر کراچی کی مشہور کریم آباد مارکیٹ پہنچے۔
کریم آباد پہنچنے پر انتظامیہ نے بچوں کو ترتیب سے کھڑا کرکے بچوں اور بچیوں کو آپس میں بانٹ لیا۔ جس کے بعد قطار میں بچوں کو مردوں اور بچیوں کو خواتین کے بازار تک پہنچایا گیا، جہاں من پسند کپڑوں اور جوتوں کی خریداری ہوئی۔ خریداری میں بچوں کی پسند اور نا پسند کا پھر پور خیال رکھا گیا۔
اس موقع پر تیمور کا کہنا تھا کہ 2015 سے کمک کی جانب سے یہ سرگرمی کی جارہی ہے جو ہم جاری رکھیں گے تاکہ ان بچوں کی عید کی خوشیاں دوبالا ہو جائیں۔
خریداری کے دوران تاجروں کی جانب سے بچوں کو جوس بھی پیش کیا گیا۔ تین گھنٹے کی خراداری کے بعد بچوں کو اسی ترتیب سے گاڑیوں تک پہنچایا گیا جیسے کہ ان کو مارکیٹ تک لایا گیا تھا جہاں سے انکی اگلی منزل بچوں کا اسکول تھا۔
