وزیر خارجہ بلاول بھٹو زرداری شنگھائی تعاون تنظیم یعنی ایس سی او کے وزراء خارجہ کے اجلاس میں شرکت کے لیے آئندہ ماہ بھارت کا دورہ کریں گے۔
وزیر خارجہ بلاول بھٹو زرداری کا متوقع دورہ بھارت 2014 میں وزیر اعظم نواز شریف کے بعد کسی بھی پاکستانی رہنما کا پہلا دورہ ہوگا۔
دفتر خارجہ کی ترجمان ممتاز زہرہ بلوچ نے ہفتہ وار میڈیا بریفنگ میں اعلان کیا کہ بلاول بھٹو زرداری 4 مئی کو بھارتی شہر گوا میں ہونے والی SCO کونسل آف وزرائے خارجہ میں پاکستانی وفد کی قیادت کریں گے۔ یہ کانفرنس دو روز جاری رہے گی۔
FM @BBhuttoZardari will lead 🇵🇰delegation to SCO-CFM meeting being held on 4-5 May 2023 in Goa,India. FM’s participation in Meeting reflects 🇵🇰’s continued commitment to SCO Charter & processes & the importance that Pakistan accords to the region in its foreign policy priorities.
— Ministry of Foreign Affairs – Pakistan (@ForeignOfficePk) April 20, 2023
ترجمان کے مطابق اجلاس میں ہماری شرکت ایس سی او کے چارٹر اور عمل کے لیے پاکستان کے عزم اور اس اہمیت کی عکاسی کرتی ہے جو پاکستان اپنی خارجہ پالیسی کی ترجیحات میں خطے کے لیے دیتا ہے۔
شنگھائی تعاون تنظیم کی صدارت پر فائز بھارت نے جنوری میں چین کے نئے وزیر خارجہ کن گینگ اور پاکستان کے وزیر خارجہ بلاول بھٹو زرداری سمیت شنگھائی تعاون تنظیم کے دیگر ارکان کو گوا اجلاس میں شرکت کا دعوت نامہ بھیجا تھا۔
مقبوضہ جموں و کشمیر کے پلوامہ میں 2019 میں مبینہ دہشت گرد حملہ میں بھارت کی جانب سے پاکستان کو ملوث کرنے اور پاکستانی حدود میں فضائی حملوں کی ناکام کوششوں کے بعد پاکستان اور بھارت کے مابین دوطرفہ تعلقات شدید تناؤ کا شکار ہوگئے تھے۔
اگست 2019 میں ہندوستان کی طرف سے جموں و کشمیر کے خصوصی اختیارات واپس لینے اور ریاست کو مرکز کے زیر انتظام علاقوں میں تقسیم کرنے کے اعلان کے بعد تعلقات مزید خراب ہوئے۔
شنگھائی تعاون تنظیم ایک علاقائی، سیاسی اور سیکیورٹی بلاک ہے جس کے ارکان میں روس، چین، بھارت اور پاکستان شامل ہیں۔ ہندوستان 9 جون 2017 کو تنظیم کا مکمل رکن بنا، جس میں افغانستان، بیلاروس، ایران اور منگولیا سمیت چار مبصر ریاستیں جب کہ آرمینیا، آذربائیجان، کمبوڈیا، نیپال، سری لنکا اور ترکی بطور مذاکراتی شراکت دار شامل ہیں۔
