دیسی گھی کسی خزانے سے کم نہیں ہے۔ دیسی گھی باورچی خانے کا وہ خفیہ جزو ہے جو ناصرف روایتی پکوانوں میں استعمال ہوتا ہے بلکہ اسے قدیم دوائیوں میں بھی صدیوں سے استعمال کیا جا رہا ہے۔ اس کے علاوہ کئی گھریلو علاج میں بھی دیسی گھی استعمال ہوتا رہا ہے اور یہ روایت نسل در نسل سے چلتی آرہی ہے۔
دیسی گھی میں صحت مند چربی، پروٹین، اومیگا 3، فیٹی ایسڈ، وٹامن اے اور بٹیرک ایسڈ وغیرہ شامل ہیں۔ اپنی روز مرہ کی خوراک میں دیسی گھی شامل کرنے سے ناصرف پکوانوں کے ذائقہ اور مہک میں اضافہ ہوسکتا ہے بلکہ ایک ہی وقت میں نزلہ کھانسی ختم کرنے، نظام ہاضمہ، میٹابالیزم، ہڈیوں اور دانتوں کی صحت کو بہتر بنانے، سوزش کو کم کرنے اور مجموعی صحت کو بہتر بنانے میں بھی مدد مل سکتی ہے۔
یہاں ماہرین دیسی گھی سے کیے جانے والے خاص گھریلو علاج کے بارے میں اہم معلومات فراہم کر رہے ہیں۔
دیسی گھی میں نزلہ کھانسی کا علاج ہے؟
اگر آپ کو سردی، نزلہ اور کھانسی جیسے مسائل کا سامنا کرنا پڑ رہا ہے تو پھر دیسی گھی کے چند قطرے آپ کے لیے حیرت کا باعث بن سکتے ہیں۔ تھوڑا سا دیسی گھی گرم کریں اور پھر اس کے چند قطرے ناک کے اندر ڈال دیں۔اس طرح دیسی گھی رکاوٹ کو ختم کرکے سانس بحال کرنے میں مدد کرے گا اور یہ نزلے کی وجہ سے ہونے والے سر درد کو بھی دور کرنے میں بھی معاون ثابت ہوگا۔
