گورنر خیبرپختونخوا غلام علی کو عہدے سے ہٹانے اور نگران صوبائی حکومت کے خلاف ہائیکورٹ میں درخواست دائر کر دی گئی ہے۔ درخواست میں موقف اختیار کیا گیا ہے کہ گورنر خیبر پختونخوا نے اپنے حلف کی پاسداری نہیں کی انہیں عہدے سے ہٹایا جائے۔
درخواست گزار معظم بٹ ایڈوکیٹ نے مؤقف اختیار کیا ہے کہ گورنر نے اسمبلی تحلیل کے 90 روز گزرنے کے باوجود الیکشن تاریخ نہیں دی۔ آئین پاکستان کے مطابق گورنر نگران حکومت قیام کے بعد الیکشن تاریخ دینے کا پابند ہوتا ہے۔ گورنر نے اپنے حلف کی پاسداری نہیں کی عہدے سے ہٹایا جائے۔
درخواست میں کہا گیا ہے کہ گورنر خیبرپختونخوا نے آئین کی خلاف وزری کی، گورنر کے خلاف آرٹیکل 6 کی کارروائی کی جائے،گورنر خیبرپختونخوا غلام علی کو عہدے سے ہٹا کر صدر پاکستان قائمقام گورنر نامزد کریں۔
درخواست گزار نے عدالت سے استدعا کی ہے کہ عدالت الیکشن کمیشن کو خیبر پختونخوا اسمبلی کے انتخابات کی تاریخ دینے کا حکم دے۔ نگران حکومت کی 90 دن مدت ختم ہو چکی ہے، نگران وزارء اپنے دفاتر خالی کریں۔
درخواست میں صدر پاکستان، وفاقی حکومت، گورنر خیبر پختونخوا اور الیکشن کمیشن کو بھی فریق بنایا گیا ہے۔
