خیبر کے علاقے تیراہ میں شہید ہونے والے 2 فوجی جوانوں سپاہی باسط علی اور سپاہی وقاص علی شاہ کو پورے اعزاز کے ساتھ ان کے آبائی علاقوں میں سپرد خاک کر دیا گیا ہے۔ شہدا کی نماز جنازہ میں بڑی تعداد میں حاضر و ریٹائرڈ فوجی افسران، عزیز و اقارب اور لواحقین نے شرکت کی۔
آئی ایس پی آر کے مطابق شہدائے تیراہ، پشاور کے 24 سالہ سپاہی باسط علی اور چارسدہ کے 24 سالہ سپاہی وقاص علی شاہ 25 اپریل کو دہشت گردوں کا بہادری سے مقابلہ کرتے شہید ہو گئے تھے۔
آئی ایس پی آر کا کہنا ہے کہ سیکیورٹی فورسز دہشت گردی کی لعنت کے خاتمے کے لیے پُرعزم ہیں۔ ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
