صدر مملکت آصف علی زرداری نے پاک بھارت حالیہ کشیدگی اور جنگ بندی پر اپنے بیان میں کہا ہے کہ پاکستانی مسلح افواج، بحریہ اور فضائیہ نے بھارتی جارحیت کا منہ توڑ جواب دے کر دشمن کو سخت پیغام دیا ہے۔
صدر مملکت آصف علی زرداری نے کہا ’مجھے ہمیشہ اپنی افواج پر اعتماد رہا ہے، اور اس معرکے میں انہوں نے جس جرأت اور جذبے کا مظاہرہ کیا وہ بےمثال ہے۔ ہم نے ‘بھارت کی نام نہاد فوجی برتری کو کاری ضرب لگائی ہے اور ثابت کیا ہے کہ ہماری قوم کا عزم ناقابل تسخیر ہے۔
یہ بھی پڑھیں: پاکستان نے جنگ بندی کی پیشکش کیوں قبول کی؟ وزیراعظم شہباز شریف نے بتادیا
انہوں نے مزید کہا کہ پاکستانی قوم کا موجودہ عزم ہمارے بانیوں کے دو قومی نظریے کو نئی قوت عطا کرتا ہے، ایک اسلامی ریاست ہونے کے ناطے، اللہ پر ہمارے ایمان نے ہمیں اس قابل بنایا کہ ہم اپنے سے کئی گنا بڑے دشمن کے سامنے سینہ تان کر کھڑے ہوں۔
صدر زرداری نے اس موقع پر آرمی چیف جنرل سید عاصم منیر، ایئر چیف مارشل ظہیر احمد بابر سدھو، نیول چیف ایڈمرل نوید اشرف اور دیگر افواج کو ان کی بہادری اور کامیاب حکمت عملی پر مبارکباد پیش کی۔
انہوں نے شہدا کو خراج عقیدت پیش کرتے ہوئے قوم سے اپیل کی کہ وہ فتح کا جشن مناتے ہوئے شہدا کے لیے دعا کرنا نہ بھولیں۔
یہ بھی پڑھیں: بھارت پاکستان سے جنگ بندی پر کیوں آمادہ ہوا؟ امریکی صحافی نے پول کھول دیا
صدر مملکت نے مسئلہ کشمیر کو جنوبی ایشیا میں پائیدار امن کے لیے بنیادی قرار دیتے ہوئے کہا کہ اقوام متحدہ کی قراردادوں کے مطابق اس مسئلے کے حل کے بغیر خطے میں دیرپا استحکام ممکن نہیں۔ انہوں نے سندھ طاس معاہدے جیسے دیگر اہم تنازعات کے حل کی بھی ضرورت پر زور دیا۔
انہوں نے چین، امریکا، ترکیے، سعودی عرب اور ایران سمیت تمام دوست ممالک کا شکریہ ادا کیا جنہوں نے پاکستان کے ساتھ اظہار یکجہتی کیا۔
صدر مملکت نے واضح کیا کہ پاکستان امن کا خواہاں ہے، کسی قسم کی اشتعال انگیزی نہیں چاہتا، لیکن اپنی خودمختاری پر کبھی سمجھوتہ نہیں کرے گا۔
