راولپنڈی، اسلام آباد، لاہور سمیت ملک کے مختلف علاقوں میں طوفانی ہواؤں کے ساتھ بارش اور ژالہ باری ہوئی ہے جس سے گرمی کا زور ٹوٹ گیا۔ تاہم کئی علاقوں میں چھتوں سے سولر پینلز اڑ گئے، جبکہ پنجاب میں مختلف حادثات کے دوران 10 افراد جاں بحق ہوگئے۔
یہ بھی پڑھیں راولپنڈی اسلام آباد سمیت ملک کے مختلف علاقوں میں بارش اور ژالہ باری
دوپہر کے وقت اچانک اندھیرا چھا جانے کے بعد تیز ہواؤں کے ساتھ بارش شروع ہوگئی، جبکہ کچھ علاقوں میں ژالہ باری بھی ہوئی۔
موسلا دھار بارش سے گرمی کا زور ٹوٹ گیا، تاہم تیز ہواؤں کے باعث مختلف علاقوں میں سائن بورڈز اکھڑ گئے، اس کے علاوہ چھتوں پر لگے ہوئے سولر پینلز بھی اڑ گئے۔
طوفانی ہواؤں کے باعث ٹریفک کا نظام درہم برہم ہوکر رہ گیا، جبکہ متعدد فیڈرز ٹرپ کرنے سے بجلی کی سپلائی بھی معطل ہوگئی۔
محکمہ موسمیات کی جانب سے اسلام آباد اور گردونواح میں آندھی اور بارش کا الرٹ جاری کردیا گیا، جس کے مطابق طوفانی ہواؤں اور ژالہ باری سے نقصانات کا خدشہ ہے، اس لیے شہری احتیاطی تدابیر اختیار کریں۔
یہ بھی پڑھیں اسلام آباد میں پھر ژالہ باری کا الرٹ، شو رومز مالکان نے حفاظتی اقدامات کرلیے
محکمہ موسمیات نے خبردار کیا ہے کہ تیز ہواؤں کے دوران درخت جڑوں سے اکھڑ سکتے ہیں، لہٰذا عوام غیرضروری گھروں سے باہر نکلنے سے گریز کریں۔
پی ڈی ایم اے پنجاب نے آندھی اور بارش کے دوران ہونے والے نقصانات کی تفصیل جاری کی ہے جس کے مطابق مختلف حادثات میں 10 افراد جاں بحق اور 51 زخمی ہوگئے ہیں۔
پی ڈی ایم اے کے مطابق شہریوں کی اموات مکانوں کی چھتیں گرنے اور غیرمحفوظ مقامات پر ہونے کے باعث ہوئیں۔ ڈی جی پی ڈی ایم اے نے کہاکہ متاثرہ خاندانوں کی مالی مدد کی جائےگی۔
