راولپنڈی اسلام آباد سمیت ملک کے مختلف علاقوں میں بارش اور ژالہ باری ہوئی ہے۔
میڈیا رپورٹس کے مطابق بارش کے باعث شہر کا موسم خوشگوار ہوگیا، راولپنڈی کے علاقے چونترہ اور اسلام آباد سے سیکٹر ڈی 12 میں ژالہ باری ہوئی۔
یہ بھی پڑھیں اسلام آباد کے مختلف علاقوں میں بارش، خیبرپختونخوا میں ژالہ باری سے گاڑیوں اور سولر پینلز کو نقصان
اس کے علاوہ مری میں کالی گھٹائیں چھانے کے بعد سیاحوں نے ملکہ کوہسار کا رخ کرلیا، اور ہلکی بارش سے لطف اندوز ہوئے۔
میڈیا رپورٹس کے مطابق خان پور کے کچھ علاقوں میں بھی بارش اور ژالہ باری ہوئی ہے جس کے بعد گرمی کا زور ٹوٹ گیا۔
آزاد کشمیر کی وادی نیلم اور مظفر آباد و گردونواح میں بھی بارش اور ژالہ باری ہوئی ہے، جس کے بعد ندی نالوں میں طغیانی آگئی۔
آزاد کشمیر میں موسم خراب ہونے کے بعد پاور ہاؤس کے فیڈر ٹرپ کرنے سے بجلی کی ترسیل بھی معطل ہوگئی، جس سے لوگوں کو مشکلات کا سامنا کرنا پڑ رہا ہے۔
یہ بھی پڑھیں تیز آندھی طوفان، شدید بارش اور ژالہ باری کا الرٹ جاری
یاد رہے کہ کچھ روز قبل اسلام آباد میں موسلا دھار بارش اور ژالہ باری ہوئی تھی، جس سے گاڑیوں کو شدید نقصان پہنچا تھا، جبکہ گھروں میں لگی کھڑکیوں کے شیشے بھی ٹوٹ گئے تھے۔
