وفاقی دارالحکومت کے شہریوں کے لیے خوشخبری ہے کہ سی ڈی اے نے میٹرو اور الیکٹرک بس سروس کے کرایوں میں حالیہ 50 روپے اضافے کو واپس لے لیا ہے۔ کرایوں میں کمی کا اطلاق فوری طور پر ہوگا۔
سی ڈی اے کی جانب سے جاری نوٹیفکیشن کے مطابق وزیراعظم شہباز شریف کی ہدایت پر کرایوں میں اضافہ واپس لیا گیا ہے۔ وزیراعظم نے گزشتہ روز وزیر داخلہ محسن نقوی کو ہدایت دی تھی کہ کرایوں میں اضافے کا فیصلہ واپس لیا جائے، جس کے بعد سی ڈی اے نے فوری عملدرآمد کرتے ہوئے نوٹیفکیشن جاری کر دیا۔
مزید پڑھیں: میٹرو اور الیکٹرک بس سروس کے کرایوں میں 100 فیصد اضافہ کردیا گیا
نوٹیفکیشن کے مطابق این-فائیو سے اسلام آباد ایئرپورٹ جانے والی بس کا کرایہ بدستور 90 روپے برقرار رہے گا۔ کرایوں میں کمی کے اس فیصلے سے روزانہ سفر کرنے والے ہزاروں شہریوں کو بڑا ریلیف ملے گا۔
یاد رہے کہ رواں ماہ یکم جون کو گرین لائن، بلیو لائن اور اورنج لائن میٹرو سروسز کا کرایہ 50 روپے سے بڑھا کر 100 روپے کر دیا گیا تھا، جس پر عوامی حلقوں کی جانب سے شدید ردعمل سامنے آیا تھا۔
