پاکستان تحریک انصاف کے 44 اراکین قومی اسمبلی نے اپنے استعفے واپس لینے کا فیصلہ کیا ہے۔
چند روز قبل اسپیکر قومی اسمبلی نے پی ٹی آئی کے 35 اراکین قومی اسمبلی کے استعفے منظور کیے تھے جس کے بعد مستعفی پی ٹی آئی اراکین قومی اسمبلی کی مجموعی تعداد 79 ہو گئی تھی۔
اس حوالے سے پاکستان تحریک انصاف کے اراکین نے پارلیمنٹ ہاؤس کے باہر میڈیا سے گفتگو کرتے ہوئے کہا تھا کہ ہم اسمبلی اجلاس میں شرکت کے لیے آئے تو ان لوگوں نے اجلاس مؤخر کر دیا اور ہم استعفوں کی منظوری کے لیے آئے تو اسپیکر نے اس سے پہلے ہی ہمارے استعفے منظور کر لیے۔
سیکرٹری جنرل پی ٹی آئی اسد عمر نے سوشل میڈیا پر جاری بیان میں کہا ہے کہ کیونکہ اسپیکر ابھی تک تمام اسمبلی ارکان کے استعفے قبول نہیں کر رہے، اس لیے پارٹی چیئرمین کی ہدایات کے مطابق 44 ارکان اسمبلی نے اپنے استعفے واپس لینے کا فیصلہ کیا ہے۔
اسد عمر نے ٹوئٹر پر ایک 44 پارٹی اراکین کے ناموں کی فہرست شیئر کرتے ہوئے مزید لکھا کہ اسپیکر قومی اسمبلی کو ای میل کر دی ہے، اگلا قدم اپوزیشن لیڈر کی نامزدگی ہو گی۔
