پاکستان کی اسرائیلی جارحیت کی مذمت، مشرق وسطیٰ کو جوہری ہتھیاروں سے پاک علاقہ بنانے کا مطالبہ

ترجمان نے بتایا کہ پاکستان گرو ارجن دیو کے یومِ پیدائش کے موقع پر سکھ یاتریوں کو خوش آمدید کہنے اور تمام تر سہولیات فراہم کرنے کے لیے تیار تھا، مگر افسوس کہ اس حوالے سے کوئی ویزہ درخواست موصول نہیں ہوئی۔ پاکستان میں سکھ برادری سمیت تمام اقلیتوں کو اپنے مذہبی تیوہار منانے کی مکمل آزادی حاصل ہے اور مذہبی تقریبات پر کسی قسم کی پابندی عائد نہیں۔

مزید پڑھیں: پاکستان کی اسرائیلی جارحیت کی مذمت، مشرق وسطیٰ کو جوہری ہتھیاروں سے پاک علاقہ بنانے کا مطالبہ

ترجمان نے کہا کہ امریکی صدر کا یہ کہنا کہ پاکستان ایران کو بہتر سمجھتا ہے، درست ہے کیونکہ دونوں ممالک کی اقدار، ثقافت، زبان اور روایات میں گہری مماثلت پائی جاتی ہے۔ پاکستان غیر مبہم انداز میں اسرائیلی جارحیت کی مذمت کرتا ہے، پاکستان ایران اور اسرائیل کے درمیان فوری جنگ بندی کا خواہاں ہے اور اس ضمن میں سفارتی کوششوں کو اولین ترجیح دی جانی چاہیے۔ کیونکہ اس کے اثرات پورے خطے پر مرتب ہو سکتے ہیں۔

پاک بھارت جنگ بندی سے متعلق ترجمان نے کہا کہ اس میں امریکا کا کردار مثبت رہا، تاہم بھارتی حکومت کے حالیہ بیانات پر تبصرہ کرنے سے گریز کیا۔ لداخ میں غیر مقامی افراد کو ڈومیسائل کے لیے اہل قرار دینے سے متعلق بھارتی اقدام کو غیر قانونی اور اقوام متحدہ کی قراردادوں کی کھلی خلاف ورزی قرار دیا۔  یہ اقدام مقبوضہ جموں و کشمیر کی آبادی کا تناسب بدلنے کی کوشش ہے، جسے پاکستان مسترد کرتا ہے۔

ترجمان نے واضح کیا کہ اب تک ایران نے سیکیورٹی یا مہاجرین سے متعلق پاکستان سے کسی بھی قسم کی معاونت یا درخواست نہیں کی، نہ ہی ملٹری سپورٹ کی کوئی باضابطہ درخواست موصول ہوئی ہے۔ ترجمان نے مزید بتایا کہ افغان مہاجرین کی واپسی کا عمل بدستور جاری ہے۔