کراچی کے علاقے شرافی گوٹھ میں ملیر ندی کے قریب پلاسٹک کے ڈرم سے ایک نامعلوم خاتون کی مسخ شدہ لاش برآمد ہوئی ہے، جو تقریباً 25 روز پرانی بتائی جا رہی ہے۔
پولیس کے مطابق خاتون کی لاش انتہائی خراب حالت میں ملی، اور اس کے ہاتھ پاؤں رسی سے بندھے ہوئے تھے۔ ابتدائی معائنے میں خاتون کی عمر تقریباً 30 سال کے لگ بھگ بتائی گئی ہے۔ عینی شاہدین کے مطابق کچھ مشتبہ افراد گاڑی میں آئے، ڈرم کو مرکزی سڑک پر پھینکا اور فرار ہو گئے۔
یہ بھی پڑھیں: کراچی: اداکارہ حمیرا اصغر کی کئی روز پرانی لاش فلیٹ سے برآمد، پڑوسی کیا کہتے ہیں؟
لاش کو جناح پوسٹ گریجویٹ میڈیکل سینٹر منتقل کر دیا گیا جہاں ڈاکٹروں نے بتایا کہ لاش سے شدید بدبو آ رہی تھی۔ پولیس نے موت کی وجہ اور وقت کے تعین کے لیے نمونے حاصل کر کے کیمیکل تجزیے کے لیے بھیج دیے ہیں۔
تاحال خاتون کی شناخت نہیں ہو سکی ہے۔ پولیس کا کہنا ہے کہ واقعے کی مزید تفتیش جاری ہے اور سی سی ٹی وی فوٹیج حاصل کر کے ملوث گاڑی کا سراغ لگانے کی کوشش کی جا رہی ہے۔
مزید پڑھیں: کراچی: فلیٹ سے 4 خواتین کی تشدد زدہ اور گلا کٹی لاشیں برآمد
پولیس حکام کا کہنا ہے کہ یہ واقعہ سنگین جرم کی طرف اشارہ کرتا ہے۔ انہوں نے عوام سے اپیل کی ہے کہ اگر کسی کی کوئی خاتون رشتہ دار لاپتا ہے تو وہ فوری طور پر متعلقہ تھانے سے رابطہ کرے۔
